Rokstu sagataveja: portals lakuga.lv

Projekts “Staiguļi”, kurs plašuokai auditorejai sevi pīsaceja pārnejuo gods vosorā ar singlu “Imūns”, niu klauseituojim pīduovoj jaunu dzīsmi – “Santimu sentiments”. Kai soka “Staiguļi”, dzīsme nav par santimim, tok par vierteibom: “Napīmynātais santims simbolizej zaļū zuoli jauneibā aba laikus, kas paguojuši, bet daļai sabīdreibys vys vēļ ir gryuts pījimt puormainis, turpynojūt skumt piec “vacūs lobūs” laiku. Santims kai nauda simbolizej ari merkantiluos vierteibys, kas itūšaļt daudzu laikabīdru vierteibu piramidā aizjam puoruok augstu vītu.”

“Staiguļi” dzīsmi izlaide 4. majā, i tys nav najaušs datums. Kai skaidroj grupys solists Jurs Vuorkaļs: “Ir paguojuši 34 godi, kai poši varim atteisteit sovu vaļsti, poši lemt i izdareit sovys izvielis. Voi pīnuoceigi nūviertejam tū? Cik nu myusu ir svāruši tū, kū naatkareiba mums davuse? Bet cik nu myusu ir “beigtuos zivs”, kas vīnkuorši maudoj pa straumi? Cik nu myusu lapnai spļaun okā, nu kurys poši dzer, i piečuok bļaun, ka vyss ir švaki?”

Dzīsme īraksteita sadarbeibā ar Māri Keišu “Bigmaar’s Records” studejā Upītē. Dzīsmis vuordu autors ir Jurs Vuorkaļs, muzykys autors – Edgars Potašs. Projektā “Staiguļi” pīsadola: Einārs Čoičs (bungys), Ralfs Punans (basgitara, bolss), Arturs Zeiļuks (akustiskuo gitara), Edgars Potašs (solo gitara), Arita Rancāne (bolss), Jurs Vuorkaļs (bolss).