Rokstu sagataveja: portals lakuga.lv

Turpynojūt okupacejis saku nūviersšonu, Reigys pošvaļdeibys Piļsātys atteisteibys departamenta Reigys vītvuordu i piļsātvidis objektu nūsaukumu komiseja pījēme lāmumu Moskovys forštati puorsaukt par Latgolys apleicīni, viestej informaceja Reigys dūmis sātyslopā.

Jaunais nūsaukums – Latgolys apleicīne, izalaseits, viertejūt viesturiskūs vītu nūsaukumus itamā apleicīnē. Jau laikā pyrma 2. pasauļa kara dokumentūs, kas apzeimej itū vītu, tyka lītuots apzeimiejums “statistikys rajons Latgola”. 2022. godā Latgolys parks dabuoja atpakaļ tuo viesturiskū nūsaukumu, kas beja atrūnams jau 1937. gods dokumentūs, sovutīs itūgod leluokuo īla itamā apleicīnē ir puorsaukta par Latgolys īlu. Jemūt vārā itūs faktus, Reigys vītvuordu i piļsātvidis objektu nūsaukumu komiseja pījēme lāmumu ari apleicīnei pīškiert Latgolys nūsaukumu.

“Paļdis komisejā asūšajim specialistim par diskuseju ceļā pījimtū lāmumu. Reigā vaira nabyus nūsaukumu, kas slavej Moskovu. Ari Moskovys forštatis kai nūsaukuma vaira nav. Tuo vītā ir Latgolys apleicīne, ar kū teik dūta prīškrūka viesturiskajam nūsaukumam,” pastreipoj Reigys vicemers Edvards Ratnieks.

Apleicīņu nūsaukumi nav pīškierti voi nūstyprynuoti kaidā nu Reigys dūmis lāmumu. Tūs i pošvaļdeiba, i dzeivuotuoji izmontoj kai viesturiski izaveiduojušus naoficialus vītvuordus. Tys nūzeimoj, ka apleicīnis puorsaukšonai nav vajadzeigs Reigys dūmis lāmums, kai ari nav juoveic grūzejumi lāmumūs, kurūs ir īkļauts vacais apleicīnis nūsaukums, kam dokumenti ir datāti. Sovutīs, pamatojūtīs iz Pošvaļdeibu lykumu, kas stuojuos spākā 2023. gods 1. janvarī, faktiski Reigai atcalts piļsātys administrativais īdalejums.

Par izmaiņom pošvaļdeiba informēs Latvejis Geotelpiskuos informacejis agenturu, kuruos Vītvuordu datubāzē ir registrāts vītvuords “Moskovys forštate”, kai ari informaceja tiks nūmaineita ari pošvaļdeibys geoportalā i Reigys apleicīņu vītnē.