Rokstu sagataveja: portals lakuga.lv

Nu 6. da 9. augusta latgalīšu kulturys kusteiba “Volūda” aicynoj jaunīšus pīsadaleit latgaliskajā seminarā “Atzolys”. Tymā varēs pīsadaleit jaunīši vacumā nu 16 da 21 goda, lai vuiceitūs latgalīšu rokstu volūdu, īpasazeitu ar myusdīnu Latgolys personeibom i procesim, izzynuotu regiona kulturviesturi i ituos šaļts īspiejis jaunīšim.

Jaunīšu seminars “Atzolys” paradzāts nu 2024. gods 6. da 9. augusta Kruoslovys nūvoda Dagdā. Seminarā pīsadaleit varēs jaunīšu nu 16 da 21 goda ar interesi vuiceitīs latgalīšu rokstu volūdu, runuot latgaliski, īpazeit latgaliskū kulturu i vierteibys, lai styprynuotu sovu identitati, byutu zynūši par procesim, nūtikšonom i personeibom Latgolā i latgaliskajā kulturā, iz prīšku poši vaira īsasaisteitu piļsūniskuos sabīdreibys veiduošonā, kai ari socializātūs, veiduotu jaunus kontaktus, satureigi pavadeitu laiku, īsadvesmuotu nu Latgolā aktivūs ļaužu i vaira izzynuotu Dagdu, tuos apleicīni i aktivūs dareituojus.

Pyrmū reizi seminars “Atzolys” nūtyka 2004. godā Ludzys nūvoda Kuorsovā, īprīškejais – 2022. godā – beja Bolvu nūvoda Rekovā, bet itūgod jaunīšu sasatikšona byus Dagdā. “Atzolys” sovulaik bejs kai atspierīņa punkts ari daudzim itūšaļt latgaliskajā kulturtelpā zynomajim aktivistim vaira izzynuot i īsasaisteit kulturys i sabīdryskajūs procesūs.

“Piec Rekovā nūtykušuo seminara nu jaunīšu sajēmem cīši lobys atsauksmis i īdviesmi, kai ari vēļ arviņ ar daudzim nu jūs sasateikam pasuokumūs, jī īsasaista “Volūdys” i cytuos latgaliskajuos aktivitatēs, atbolsta nūtikšonys. Vairuokim jaunīšim seminars beja motivaceja suokt voi vaira runuot latgaliski kasdīnā, par kū asam cīši, cīši prīceigi. Juotur nūceja, ka tai saīs ari piec sasatikšonys Dagdā,” soka latgalīšu kulturys kusteibys “Volūda” vadeituoja Edeite Laime.

Ar jaunīšim seminarā struoduos: latgalīšu rokstu volūdys nūdarbeibys pasnēgs latgalīšu rokstu volūdys specialiste Māra Mortuzāne-Muravska, improvizacejis nūdarbeibys vadeis pasuokumu vadeituojs i improvizators Kozmens (Mārtiņš Kozlovskis), par Latgolu i latgaliskū marketingā stuosteis  uzjiemiejs i zeimyna “Latgalactica” radeituojs Raimonds Platacis, raidīrokstu veiduošonys praktiskū darbneicu vadeis jaunīšu raidejuma “Pīci breinumi” komanda, par Latgolys informativū telpu runuos raidejumu veiduotuoja Vladislava Romanova, ar latgalīšu volūdys lītuošonu i vajadzeibu digitalajūs reikūs īpazeistynuos projekta “Bolsu tolka” puorstuove Kristīne Pokratniece, rodūšuos darbneicys vadeis dizainere Liāna Merņaka-Ņikitina, taipat seminarā gasteis ari cyti lektori, aktivisti i latgalīšu kulturys personeibys.  

Vysys seminarā paradzātuos aktivitatis, ādynuošona i nakšņuošona byus bezmoksys, dalinīkim pošim tik juonūdrūsynoj tikšana iz i nu seminara. Kab pīsadaleitu seminarā, jaunīšim da 10. juņa juoaizpiļda dasacejuma anketa ite: https://ej.uz/Atzolys2024. Apstyprynuojumu par pīsadaleišonu seminarā reikuotuoji nūsyuteis da 14. juņa, jemūt vārā daleibīku motivaceju pīsadaleit.

Seminara nūtikšonu finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu, kai ari Latgolys kulturys programa, kurū eistynoj Latgolys regiona atteisteibys agentura ar Vaļsts kulturkapitala fonda mierkprogramys “Latviešu vēsturisko zemju attīstības programma” atbolstu. Seminara reikuotuojs – latgalīšu kulturys kusteiba “Volūda” (bīdreiba “LgSC”).