Rokstu sagataveja: portals lakuga.lv

Pīktdiņ i sastdiņ, 10. i 11. majā, Rēzeknē i Varakļuonūs nūtiks storptautyska konference “Daudzvalodība Latgalē. Pagātne – tagadne – perspektīvas”, kurā, kai viestej konferencis programa, tei veļteita vysaidajom volūdom Latgolā, kai ari runuotūs temu vydā byus ar latgalīšu volūdys aspekti.

Konferenci “Daudzvalodība Latgalē. Pagātne – tagadne – perspektīvas” reikoj Varšavys Universitatis Kulturys napuorsatraukšonys pietnīceibys i praksis centrs, Rēzeknis Nacionalūs bīdreibu Kulturys noms, kai ari Varakļuonu nūvoda muzejs. Konference ir daļa nu storptautyska projekta, kura mierkis ar vysaidom metodem ir vuokt datus, analizēt, pieteit i radeit leluoku izpratni par tū, kai rūnās i teik uzturāta vītejuo daudzvolūdeiba, deļkuo tei izabeidz i kai tei var otkon rastīs nu jauna. Projekta komanda pietej vītys ar lelu volūdu koncentraceju vairuokuos pasauļa vītuos: Vyds i Austrumeiropā tuos ir Latgola Latvejā, Kašubeja i Belsko-Bjala Pūlejā, kai ari atseviški regioni Meksikā, Dīnavydafrikā i Vanuatu.

Nūtikšonys pyrmajā dīnā, 10. majā, kas paradzāta Rēzeknē, vysu referatu vydā varēs dzierdēt Rēzeknis Tehnologeju akademejis i Latvejis Universitatis Literaturys, muokslys i folklorys instituta pietnīku sacynuojumus par volūdu kodu pasameišonu latgalīšu tekstūs Latvīšu folklorys kruotivis digitatalajā arhivā garamantas.lv, latgalīšu kulturys kusteibys “Volūda” kai navaļstiskuos organizacejis pīredzi latgalīšu volūdys populariziešonā, kai ari Daiņa Mjartāna prezentaceju par latgalīšu volūdys lītuošonys perspektivom publiskajā vidē. Sastdīnē, 11. majā, kurys programa byus Varakļuonūs, byus Stefanejis Latkovskys stuosts, kas dasadūrs latgaliskajam trymdā, Varakļuonu nūvoda muzeja vadeituoja Terese Korsaka runuos par latgalīšu volūdys sasaglobuošonu Varakļuonūs i diasporā, demografejis pietnīks Ilmārs Mežs dasadūrs temai par daudzvolūdeibu Latgolys tautys skaiteišonu datūs, Oduma Mickeviča Poznanis universitatis vuiceibspāki prezentēs provizoriskū interveju analizi par daudzvolūdeibu Latgolā 20./21. godu symtā, kai ari byus vareiba dzierdēt cytu pietnīku pietejumu rezultatus i stuostus. Ar pylnu konferencis programmu var īpasazeit ITE.

Konference ir bezmoksys. Tei nūtiks latgalīšu, latvīšu i angļu volūduos.