Rokstu sagataveja: portals lakuga.lv

Ituo gods 3. majā Preiļu nūvoda Rībeņu pogosta etnografiskais ansamblis “Jumaleņa” ar koncertu svieteja sovu 40 godu jubileju. Svātkūs “Jumalenis” daleibnīki beja poši sev sagatavejuši ari breineigu duovonu – ansambļa pyrmū albumu “Zīdi”.

Jau ostoņus godus “Jumalenis” vadeituojs ir Oskars Bērziņš, kurs, kai soka ansambļa dalineica Marija Volkova, vysod zyna, kai paslavēt kotru dzīduotuoju i īdūt tam “jaunus spuornus”. Oskara Bērziņa vadeibā etnografiskais ansamblis ir regulari pīsadalejs daudzūs koncertūs i skatēs, vysūs festivalūs “Baltica” i pārņ ari Dzīšmu i deju svātkūs.

Ar lelu īdviesmi i ryupeigu dorbu kolektivs tics pi sova pyrmuo lūluojuma – kompaktdiska. Marija Volkova pastreipoj, ka te eipašs paļdis ir juosoka Andrim Slišanām par paleidzeigys rūkys snēgšonu, Mārim Keišam i juo “Bigmaar’s Records” īrokstu studejai. Diska dizainu veiduojušys muokslineicys Liene Ivanova i Laine Spūle. Taipoš paļdis teik saceits ari “Viduslatgales pārnovadu fondam” i Evijai Gurgānei, sovpus par breineigū mandolinys spēli paļdis juosoka Matīsam Lojānam.

Diskā apkūpuotys devenis dzīsmis, kuru golvonais motivs ir zīdiešona, kas, kai stuosta Oskars Bērziņš, juouztver kai cylvāka zīdiešona. “Četrdesmit godu ir sevkura cylvāka pats zīdiešonys laiks, kod tu vēļ esi jauns, tok varbyut paspiejs ari dzeivē koč kū sasnēgt, īsamīļuot, nūdybynuot saimi, sataiseit karjeru i tamleidzeigi,” jis ari soka, ka diskā ir īkļauta vīna dzīsme, kas ir ilggadejuo ansambļa vadeituoja Juoņa Teilāna meiluokuo, taipoš ari dzīsme ar nūsaukumu “Zemli zvaigzneite”, kas veļteita tim “jumalānim”, kuri niu jau dzīd cytūs dabasu laukūs.

Iz diska vuoceņa ir attāluots dečs, kū 1938. godā Saunys pogosta Smeļteru cīma “Gribinānūs” darynuojuse Veneranda Gribonika.

Koncerta svātku reizē tyka pīmynāti ari īprīškejī kolektiva vadeituoji – bejušais Rībeņu kulturys noma direktors Bronislavs Kokorišs, taipoš kolektivu ir vadejuši Juoņs Teilāns, Lidija Vija Grauze, Uldis Bērziņš, Anna Briška, Aija Smirnova i Antra Skutele.