Rokstu sagataveja: portals lakuga.lv

Pīktdiņ, 17. majā, ar storptautyskai atzeituos latvīšu keramikis Ilonys Romulis lekceju i treis izstuožu atkluošonom nūsaslēgs 12. Storptautyskais keramikys muokslys simpozejs “Ceramic Laboratory”, informej Rotko muzeja puorstuove Inita Paegle.

Simpozeja oficialuo atkluošona tyka aizvadeita 2. majā ar daleibnīku dasacejuma dorbu izstuodi stykla galerejā “4METRI”. Sekuoja īdvasmojūšys ekskursejis pa Daugovpili i Daugovpiļs cītūksni, kuru laikā muokslinīki giva īspaidus, kab tūs transformātu keramikys materialā jaunūs muokslys dorbūs. Vys vēļ turpynojās intensivs dorbs keramikys studejuos, cepļu kūršona, paraugdemonstriejumi i meistarklasis.

Rodūšais dorbs kulminēs 17. majā. 14.00 stuņdēs Rotko muzeja konferenču zālē storptautyskai atzeituo i gūdolguotuo latvīšu keramike Ilona Romule vadeis lekceju par litofanejis tehniku porcelana muokslā. Sovutīs 16.00 stuņdēs sekuos simpozeja nūslāguma izstuodis svineiguo atkluošona i simpozeja daleibnīku sumynuošona.

Sūpluok simpozeja izstuodei tiks atkluota ukraiņu muokslinīka Vjačeslava Pasinoka ceļojūšuo izstuode “Cerība bērna acīm”. Tamā radzamūs keramikys objektus muokslinīka vadeibā taiseja ukraiņu bārni, kas globuojuos nu bombardiešonys Harkivys metro stacejā. Atkluošonu pīdzeivuos ari pūļu muokslineicys, simpozeja dalineicys Alīcijis Bulavkys-Fankidejskys keramikys personalizstuode “Iespējamās formas” Rotko muzeja Martinsona sātā.

Simpozejs salutēs 18. majā 23.00 stuņdēs muokslys duorzā pi Martinsona sātys, kur pūļu keramiki Alīcija Bulavka-Fankidejska i Dmitrijs Bulavka-Fankidejskis performativi atkluos vierīneigu guņs skulpturu. Īīšona pasuokumūs bez moksys.

Šudiņ muols apvīnoj pūdnīceibu, dizainu, tieļnīceibu i cytus muokslys medejus. Tikom simpozeja rodūšuos aktivitatis apvīnoj muokslinīkus, kas ar tū struodoj. 12. Storptautyskajā keramikys muokslys simpozejā pīsadaleja Roberts Bučeks (Robert Buček, Čeheja), Ilona Romule (Latveja), Otars Vepkhvadze (Otar Vepkhvadze, Gruzeja), Rima Leipuviene (Rima Leipuvienė, Leitova), Šrinija Čaudhuri (Srinia Chowdhury, Indeja), Diāna Boitmane (Latveja), Lilija Zeiļa (Latveja), Una Gura (Latveja), Ilona Abdulajeva (Latveja), Nellija Dzalba (Latveja), Kristīne Nicmane (Latveja), Aihatuna Atešina (Ayhatun Ateşin, Kipra), Kāns Džandurans (Kaan Canduran, Turceja), Alīcija Bulavka-Fankidejska (Alicja Buławka-Fankidejska, Pūleja) i Dmitrijs Bulavka-Fankidejskis (Dmitrij Buławka-Fankidejski, Pūleja).

Simpozeja izstuode Rotko muzejā, taipat kai Alīcijis Bulavkys-Fankidejskys keramikys izstuode “Iespējamās formas” Martinsona sātā apsaverama da 25. augusta. Sovutīs Vjačeslava Pasinoka izstuode “Cerība bērna acīm” apsaverama tik divejis dīnys – nu 17. da 18. maja.