Rokstu sagataveja: portals lakuga.lv

2024. godā, svietejūt Muokslu izgleiteibys kompetencis centra “Latgolys Muzykys i muokslys vydsškola”(MIKC LMMV) strukturvīneibys – Rēzeknis Muokslys i dizaina školys (RMDS) – 65 godu jubileju, gaidomys vairuokys svineigys nūtikšonys, informej školys puorstuove Evelīna Elksnīte. Tradicionali teik organizāta ari eipaša izstuode, itūreiz ar nūsaukumu “Skolotājs”. Tei gūdynuos muokslys gaismys napuortraukteibu, školuotuoju īguļdejumu muokslys izgleiteibā i pedagoga lūmu muokslinīku paaudzēs iz prīšku. Izstuode ituo gods oktobrī i novembrī tiks organizāta reizē divejuos ekspozicejuos – Latgolys viestnīceibā “Gors” i RMDS telpuos.

Rēzeknis Muokslys i dizaina škola jau nu tuos dybynuošonys 1959. godā vysod varējuse lapnuotīs ar augstvierteigu, profesionalu pedagogu sastuovu. Muokslys školuotuoju padūmi, atbolsts i pīredze jaunīšūs atteista muokslinīcyskū meistareibu, veicynoj studentu pošapziņu i rodūšū dūmuošonu. Muokslys školuotuojs veidoj stypru pamatu i īdviesmi paaudzem iz prīšku. I kod školuotuoja audzieknis pats teik par školuotuoju, muokslys gaisma īsamirdz myužeigai.

Vysi bejušī i asūšī RMDS pedagogi, kai ari absolventi, kuri tykuši par muokslu jūmu školuotuojim cytuos izgleiteibys īstuodēs, teik aicynuoti registrētīs daleibai jubilejis izstuodē da ituo gods 15. augusta, elektroniski aizpyldūt anketu. Muokslys dorbu īsnēgšona kluotīnē (Bazneicys īlā 34a, Rēzeknē) tiks organizāta da ituo gods 15. septembra.

Īsnādzami na vaira kai diveji dorbi sevkurā muokslys, dizaina voi lītiškuos muokslys jūmā (metals, kūks, restauraceja, keramika, apgierbu dizains, tekstils, rūkdorbi, grafika, reklama (komunikacejis dizains), animaceja, foto, audiovizualuo muoksla, gleznīceiba, tieļnīceiba i c.). Īsnādzūt dorbus, tim juobyut gotovim eksponiešonai. Dorbus ekspozicejai “Gorā” viertēs naatkareigs muokslys zynuotnīks.