Rokstu sagataveja: portals lakuga.lv

“Piec Muotis dīnys nūtykumu pylnzīda, ruodīs, sajiutys i pruots pīklust. Gribīs apsastuot, aizadūmuot i izbaudeit eisuos i eistuos šaltenis kai pošu saimēs, tai kulturys darbinīku pasuokumūs radeituos. Bet īmam iz prīšku, lai ar pīniņu, uobeļu zīdu reveransu pasaklaneitu vosorai. Izbaudom nedeļu pyrma Vosoryssvātku,” tai sovuos sajiutuos doluos ituos nedelis kulturys īsacejumu autore Skaidreite Svikša – gruomotu autore, redaktore, korektore i rodūšūs aktivitašu organizatore.

Paturpynuot bierneibu

Paturpynuot ceļojumu pa bierneibu aicynoj Bolvi, kur Saimis dīnā, 15. majā, piļsātys skverā biblioteka reikuos duorza svātkus “Kas nūteik Dyžmežā?”. Breineigī Margaritys Stārastis zeimiejumi nanūvecej, pīmynūt juos 110. jubileju. Muzyka, ilustracejis, sejeņu apgleznuošona – vyss, kū vajag ceļam iz vosoru!

“Dabasu durovu” koncerts Daugovpilī

Ka gribīs, lai dzīsmēs izkaņ “Dīnys i nadīnys”, vari dūtīs iz Daugovpili, kur 17. majā 18.00 stuņdēs Kulturys pilī izkanēs “Dabasu durovu” koncerts ar eipašajim gostim, taidim kai britu rokmuziks Teds Boterils, myusu pošu dzīdūšī Jurs Ostrovskis, Laura Svikša, Jana Dudare un Amanda Lapa i cyti. Taipoš 17. majā 18.00 Baļtinovā izskanēs koncerts “Es Tev novēlu”, kurā uzastuos dzīduotuojs Kaspars Antess i pianists Anatolijs Livča.

Nedelis kuļminaceja – Muzeju nakts

Nedelis kuļminaceja nūteikti byus 18. majs i Muzeju nakts, kas jau 20. godu Latvejā vylynuos ar plotu pīduovuojumu. Itymā godā ar moto “izzināt un iegūt, pētīt un saprast” var izmest lobus leikumus kulturys baudejumūs.

Rēzeknē sešys kulturvītys aicynuos baudeit i viesturi, i muokslu, i muzyku. Ka viņ naplanavuotu byut cytur, es nūteikti īsagrīztu Rēzeknis Muokslys nomā, lai izbaudeitu 3D meditaceju, plašu (i kompaktdisku) apgleznuošonys darbneicu i spēlē īpazeitu Latgolys gleznīceibys vacmeistarus. Tuoļuok pa ceļam var īsagrīzt Lūznovā, kur gaideis sarunys par Latgolys pūdnīkim, a Maltā varēs izzynuot latgaliskuos rūtys, tārpus i stuostus (taišni ite dzeivoj “Kroma kolna bruolistis” vadeituojs Aleksandrs Lubāns). Varit Maltā i apsastuot i vysu vokoru baudeit kai pastaleņu taiseišonu, tai Gunāra Indričāna čardaka stuostus… a varit i pabraukt tuoļuok.

Gaļānūs pīstuojit, ka gribīs kaidu goreigu – filozofisku baudu, pīmāram, Roberta Mūka jaunū gruomotu “Šai dzīves ievārījumā kaut kā trūkst” (prezentacejā gasteis Dārta Sīka nu izdevnīceibys “Latvijas Mediji” i literaturzynuotneica Inguna Daukste-Silaspruoge).

A tuoluok laidit iz Varakļuonim. Jī itymā nedēļā byus uzmaneibys centrā valsts lāmumu leiminī, bet tys ar daleitom emocejom. Deļtuo vysmoz kulturys ziņā gribīs ceļt sauleitē itū Latgolys dyžgoru šyupeli. Ari poša tī byušu Muzeju naktī.

18.00 stuņdēs muzejā gūdynuos senejuos prasmis – izšyusteišonys saglobuotuoju i popularizātuoju Aļbinu Lukjanovu. Juos 33 izšyustātys gleznys – padsmit godu laikā topušys, bet līcynoj par kruosainūs dīdzeņu mīlesteibu myuža garumā. A 20.20 plānuota Andreja Svylāna gruomotys “Eiropas skaistākie dārzi” prezentaceja. 21.00 muižys piļs parkā byus interaktiva ekskurseja piec grafa M. Borha poemys “Varakļānu pils jūtu dārzs” motivim. Nūteikti byus, kū redzēt i just!

Tik breineigi sagaideisim Vosoryssvātkus (šūgod tī 19. majā)! Vēl pyrma dūšonuos pa muzeju stuostim, nūteikti – kai kotru godu sātā sanessim bārzu zorus, lai smaržoj kotrs pakseits… Nu bierneibys pīmiņu teirūs ustobu i bārzu smuordu. Pi kotrys guļtenis tāvs ar muoti īmērce garus bārzu zorus voi mozus bierzeņus i guļūt varēja pieteit lapenis i aizmigt naatkuortojamā smuordu muokulī… Tys nūteikti byus muns zaļais punkteņš nedelis kulturys nūtykumu afišā. Lai jius atrūnat sovejūs…

Ar itim i vēl daudzi cytim nūtykumim (tymā skaitā arī Lelū Latgolys zaļumballi Lūznovys muižys parkā 25. majā) sagaidom vosoru vysā tuos skaistumā! Tik atrūnit laiku sev – pošinventarizacejai, pauzei, atpyutai, i sirds pīsapiļdeis da molu!