Rokstu sagataveja: portals lakuga.lv

10. majā Latgolys viestnīceibā “Gors” tyka sveikti Juoņa Gleizda bolvys fotografejā 2024 daleibnīki, informej Rēzeknis nūvoda pošvaļdeibys puorstuove Jūlija Jurāne. Golvonū bolvu sajēme Eduards Medvedevs ar dorbu “Aizturot elpu”, kas bija īsnāgts žanrā “Sports”.

Sagaidūt foto muokslinīka Juoņa Gleizda (1924–2010) symtū jubileju, Rēzeknis nūvoda pošvaļdeiba sadarbeibā ar Latgolys fotografu bīdreibu izsludynuoja foto konkursu malnboltajā fotografejā. 282 daleibnīki nu vysaidu Latvejis molu īsyuteja vaira nakai 1000 fotografeju pīcūs žanrūs – “Ainova”, “Akts”, “Klusuo doba”, “Portrets” i “Sports”. Svineiguo pasuokuma laikā Latgolys viestnīceibā “Gors” tyka apbolvuoti pyrmūs treis vītu uzvarātuoji kotrā žanrā. Golvonuos bolvys sajiemiejs – Eduards Medvedevs nu Rēzeknis – tyka pi 1000 eiro naudys bolvys, kai ari medalis, kū taisejs metalmuokslinīks Norberts Kudiņš.

“Kūpā ar Igoru Pliču, kurs ir golvonais itūs aktivitašu generators, vīnuojomēs, ka juoorganizej konkurss, kab tymā var īsasaisteit vysi Latvejis fotografi. Žurejis dorbs ir nūsasliedzs, i Latgolys viestnīceibys “Gors” telpuos ir radzami 30 lobuokī dorbi, kai ari Juoņa Gleizda lobuokūs dorbu reprodukcejis. Itaidā veidā mes meistaram izsokom pateiceibu par juo padareitū na tik Iļžukolna, Rēzeknis nūvoda, bet vysys Latvejis lobā,” tai sovā uzrunā saceja Rēzeknis nūvoda dūmis prīšksādātuojs Monvīds Švarcs.

Pasuokuma laikā daleibnīkim tyka prezentāta Rēzeknis nūvoda pošvaļdeibys Kulturys i turysma puorvaļdis sagataveituo eiskina par Juoni Gleizdu. Taipat Rēzeknis nūvoda dūme pasnēdze pateiceibys rokstu foto muokslinīkam, foto viesturnīkam, Latgolys fotografu bīdreibys dybynuošonys iniciatoram i prīšksādātuojam Igoram Pličam par Juoņa Gleizda vuorda i davuma populariziešonu i īguļdejumu konkursa dybynuošonā i organiziešonā.

Nu 9. apreļa da 19. maja Latgolys viestnīceibys “Gors” muokslys galerejā i pyrmuo stuova seminaru telpā ir eksponāta Juoņa Gleizda symtgadei veļteita izstuode “GAISMĀ. punkts”.

Juoņs Gleizds dzims 1924. gods 7. majā Rēzeknis nūvoda Vacgailumūs. Juo rodūšuos gaitys fotografejis nūzarē nūvārtātys kai Latvejis, tai storptautyskā mārūgā, pīsadolūt 800 izstuodēs vysūs pasauļa kontinentūs i sajēmūt 170 medaļu, kausu i Grand Prix bolvu. Muokslinīkam 1979. godā pīškierts Storptautyskuos fotomuokslys federacejis gūda tituls (AFIAP), 1985. godā – LPSR Nūpalnim boguotuo muokslys darbinīka gūda nūsaukums, 1988. godā – Storptautyskuos fotomuokslys federacejis ekselencis tituls (EFIAP). 1989. godā Juoņs Gleizds tyka par Mārtiņa Buclera premejis laureatu. 1995. gods 3. majā Juoņam Gleizdam par padareitū fotomuokslā pīškierts Treju Zvaigžņu ordiņs.