Rokstu sagataveja: portals lakuga.lv

Sastdiņ, 18. majā Olyuksnys nūvoda Ērmaņu muižā, kur saiminīkoj Prauliņu saime, tyka atkluota šveicīšu muziķa i muokslinīka Vincenta Flikigera grafikys dorbu izstuode, kurys daļa veļteita ari muokslinīka pīredzei, vosoruos dzeivojūt Latgolā. Portals lakuga.lv pīduovoj fotoreportažu nūtikšonā.

Muzikis i muokslinīks Vincents Flikigers (Vincent Flückiger) dzims Friburgā, Šveicē, bet jau aptyvai 20 godu kotru vosoru gastej Latgolā, nu kurīnis ir juo dzeivibīdre – čelliste Ilze Grudule. Varakļuonu nūvoda Stiernīnē dzeivoj Ilzis saime i kotru vosoru vīnu mienesi Vincets ari rauga pavadeit Latgolā. Tai pyrma vairuoku godu, braukojūt pa apleicīni ar velosipedu, roduos zeimiejumu sereja “Latgale laika ritā”, kura pyrmū reizi izstuodē beja apsaverama jau 2016. goda suokuos Rēzeknē, Latgolys kulturviesturis muzejā, bet piec tam bejuse vēļ cytuos vītuos Latgolā, kai ari uorzemēs – Čehejā i Šveicē. Piečuok, 2022. godā, sadarbeibā ar latgalīšu kulturys kusteibys vadeituoju Edeiti Laimi, kura ir ari portala lakuga.lv žurnaliste, izdūta eisūs stuostu i zeimiejumu gruomota “Trusīni vessim reitā pi puiša”.

“Tī ir muni kai uorzemnīka īspaidi Latgolā. Es raudzeju pamaneit i īmyužynuot vysu, kas maņ ruodīs cytaižuoks. Braukuoju apleik ar ritini, zeimieju tū, kū redzieju. Mani interesēja, ka cylvāki nu Latgolys jau vaira napamona kaidus objektus, par pīmāru, pīna goldus. Jim tys ruodīs īrosts,” par cyklu “Latgale laika ritā” stuosta Vincents.

@voluuda 18. majā Olyuksna nūvoda Ērmaņu muižā nūtyka šveicīšu muziķa i muokslinīka Vincenta Flikigera koncerts i izstuodis atkuošona. ✍️ Izstuodis vīna daļa veļteita Latgolai — Vincenta pīdzeivuotajam Varakļuonu nūvoda Stiernīnis apleicīnē. Piečuok zeimiejumi ar @Edeit E eisajim stuostenim izguojuši @voluuda izdūtajā gruomotā “Trusīni vessim reitā pi puiša”. 🖼️ Vincenta Flikigera grafikys vysu vosoru apsaveramys Ērmaņu muižā, kurā saiminīkoj Prauliņu saime. #Ltg #latgaliski #latgalian #latgale #latgola #voluuda #rokstilatgaliski #vincentflueckiger ♬ original sound – Volūda

Grafikys dorbu izstuode niu vysu vosoru byus apsaverama Olyuksnys nūvoda Ērmaņu muižā, kur saiminīkoj komponists Ugis Prauliņs ar dzeivisbīdri, animacejis filmu producenti i muokslineicu Ingu Prauliņu, kurys dzymtys saknis īt nu Latgolys. Izstuodē apsaverami diveji Flikigera dorbu cykli – vīns nu tūs ir taišni “Latgale laiku ritā” ar Stiernīnis apleicīnē pīdzeivuotū, bet ūtrys ir gravirys tehnikā taiseitūs grafiku izlase, kurā var apsavērt šaļts nu muziķa koncertu dzeivis – piļsātu skotus, sasagataveišonu koncertim, koncertvītu arhitekturu i cytys. Vīnā nu dorbu radzams ari Rēzeknis nūvoda Lūznovys muižys arhitekturys elements.

Izstuodis atkluošona i koncerts 18. majā īzeimuoja Ērmaņu muižys jaunuos koncertsezonys atkluošonu. Koncertā Vincets Flikigers īpazeistynuoja klauseituojus ar renesaņsis laika muzykys instrumentu – arhilautu. Koncertā skanēja 17. godu symtā radeitī itaļu komponista Dž. Dž. Kapspergera (1580–1651)  dorbi.

Fotogalerejā: Vincenta Flikigera izstuodis atkluošona i koncerts Ērmaņu muižā, foto Edeite Laime