Rokstu sagataveja: portals lakuga.lv

Piec garuokys klusuma pauzis ar jaunu i atraktivu dzīsmi atsagrīž grupa “Solversija”. Dzīsmis “Jauna dīna” pamatā ir niu socialajūs teiklūs par cīši popularu palykušuo skaņdorba “Wellerman” meļdeņš i vīna nu grupys dalinīku – Raiva Kuznecova – teksts.

Grupys “Solversija” aizsuokumi meklejami vēļ 2003. godā, kod tei sovu ceļu suoce kai goreigūs dzīšmu vokalais ansamblis. Kai stuosta grupys vadeituoja Solvita Plivča, pa godim grupys sastuovs asūt gona daudz pasamainejs, vys “Solversija” ir eistyna paaudžu grupa, kur kūpā muzicejuši vacuoki i jūs bārni. Niu grupā ir deveni dalinīki, kuri kūpā muzicej jau vairuokus godus, jaunuokajam dalinīkam ir 20 godu, sovpus pīredziejušuokajam – 57 godi. Grupys dalinīki ir Valdis Pudniks, Juoņs Jakušonoks, Inese Kuznecova i Raivis Kuznecovs (mama i dāls), Tatjana Kromāne i Artūrs Kromāns (mama i dāls), Olga Gekiša, Līga Gabrāne, Ināra Sadovska. Vokaluos grupys vadeituoja ir Solvita Plivča.

Grupys vadeituoja Solvita Plivča pastreipoj, ka car laikim bejušys vysaidys situacejis, ari taidys, kod grupa bejuse iz pajukšonys rūbeža. Eipaši pandemejis pūsmys bejs gryuts, vystik grupys dalinīki ari tod variejuši īraksteit dzīsmi, īmūt iz īrokstu studeju pa vīnam. “Mes dzīdim tū, kas pateik pošim, naraugom sekuot nikaidom teņdencem. Itei jiurinīku dzīsme palyka tik populara, ka ari mums gribiejuos sovu verseju. Tod grupys dalinīkim beja sātys dorbs, raudzeit sadūmuot vuordus. Vys vīns nu dalinīku, Raivis Kuznecovs, puors stuņžu piec ituo sātys dorba aizdūšonys, kūpejā grupys čatā atsyuteja jau gotovu tekstu, kuram mes, puorejī, viņ dažus vuordus pīlobuojom,” stuosta vadeituoja Solvita.

Jaunuokuos dzīsmis ar nūsaukumu “Jauna dīna” melodeja īt nu baladis tipa folkdzīsmis, kas pīraksteita ap 1970. godu Jaunzelandē, tok 2021. godā Neitana Evansa (Nathan Evans) kaververseja palyka par socialūs medeju hitu. Itei dzīsme ir tulkuota daudzuos pasauļa volūduos, tok niu ari latgaliski. Dzīsmis producents ir Kaspars Maks, bolsus īraksteja Ernests Vjaters, video veiduoja Ilmārs Bierzeņš.

Vēļ grupys vadeituoja Solvita Plivča pastreipoj, ka pošai grupai vīna nu meiluokūs dzīšmu ir “Babeņa”, kurys muzykys i vuordu autors ir Aņss Ataols Bierzeņš, producents Kaspars Maks i video autors Ilmārs Bierzeņš. Dzīsme ir par sovom dzymtys i tautys saknem, kurys taipoš kai ūzulam ir īsasakņojušys dzili zemē i meiļoj sovu Latgolu. “Itū dzīsmi asam dzīduojuši daudzys reizis, tok nu suokuma pat navarejom vysu bez osoru nūdzīduot, kam kotrys nu myusu tū cīši individuali izjiut car sevi,” tai Solvita.

Par grupu vaira var izzynuot tuos Facebook lopā, taipat dzīsmis daīmamys ari grupys YouTube kontā.