Rokstu sagataveja: portals lakuga.lv

Pi skaiteituoju tics žurnala “A12” juņa/juļa numers i tymā var puorskaiteit intervejis ar Jura Soikāna Ludzys muokslys školys pedagogi Ivetu Ladusāni, Baļtinovys amaterteatra “Palādas” režisori i dramaturgi Anitu Ločmeli aba Danskovīti, arhitektu Intu Pujātu i cytys sarunys i stuostus.

Žurnala “A12”, kas ir vīneigais žurnals, kas viestej par Latgolys ļaudim i jūs stuostim, redaktore Ināra Groce ituo numera īvodā soka: “Divdesmit godu pīdareiba Rītumu kulturys telpai i Eiropys Savīneibai ir attaisejuse rūbežus kai ceļuošonai, tai pruota uztveris mārūga paplašynuošonai. Tei ir vareiba boguotynuotīs ar vysaidu tautu cylvāku pīredzem i pajimt sev kaidu daleņu prīcai i dzeivis gudreibai.”

Žurnala “A12” juņa/juļa numerī skaitit:

• Sarunu ar rodūšū školuotuoju Ivetu Ladusāni par muokslu i juos drūsū pasauļa molu, kurā sevi pīdzeivuot;
• Tonna Latvejis špeka Ukrainai. Diveji uzjiemeigi veirīši – Ontons i Ingus – doluos īspaidūs par padareitū, organizejūt paleidzeibys kravys ukraiņu karaveirim;
• Pūdnīku dīnu pīzeimis stuosta par keramiku, kai tei aicynoj redzēt, sajust i svieteit Latgolys muolu;
• Kū nūzeimoj “Bolsu tolka”? Iniciativys puorstuovi skaidroj, kas tys ir i kai kotrys latgalīts var īsasaisteit itymā projektā i pīvīnuot sova bolsa īrokstu;
• Pasauļa breinums, Latvejis gūds i Latgolys lapnums – Juoņs Gleizds. Aicynojam apsavērt fotografa i muokslinīka Juoņa Gleizda padareitū i pamastū montuojumu;
• Pīcys atzinis par byutyskū arhitekta, uzjiemieja, skulpturu “Oduma meitys” autora dzeivē. Kai jam izadūd sovā profesionalajā darbeibā paleidzēt cylvākam sakuortuot pruotu?
Taipat žurnalā ari par aktualajom nūtikšonom, kurymuos baudeit muokslu, par jaunumim Latgolys literaturā, vosorys pasuokumim Lūznovys muižā i cyti stuosti, kurūs veļdzētīs korstajā vosorā.

Jaunuokajā žurnalā “A12” vysu rokstu vydā ari portala lakuga.lv redakcejis komandys taiseitī stuosti – ar Anitu Ločmeli sasarunoj Laura Melne, bet intervejis fotografejis sagatavejuse Amanda Anusāne. Taipat žurnalā puorskaitoma portala redakcejis sagataveituo informaceja par jaunuokajim gruomotu izdavumim i “Bolsu tolku”.

Žurnals “A12” ir vareiba jau vaira nakai 10 godus izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturiskūs ceļuojumūs laikā i telpā, kai ari byut atkluojumu i puordzeivuojumu dalinīkim. Žurnals izīt 6 reizis godā. Kab atbaļsteitu žurnala byušonu ari iz prīšku, aicynojam abonēt. Jaunuokū žurnala numeri var nūpierkt (kai digitalā, tai taustomā veidā) ite: a12.lv.