Rokstu sagataveja: portals lakuga.lv

“Skrīsim, muosys, skrīsim, bruoli, bosom kuojom mes pa zuoli. Izbroduosim vysys nūpļautuos plovys!” tai dzīsmē “Vosora” dzīd grupys “Marysana Band” soliste Santa Savicka-Drozdova. Kasdīnā Santa dzeivoj Reigā, tok breivdīnuos vysod rauga māruot ceļu iz Latgolu, kur jei nu Latgolys dobys ainovom i mīra daboj lelu īdviesmi i luodeņu jaunim dorbim, taipoš ari teik pi pozitivu emoceju i prīcynoj vītejūs ar grupys uzastuošonom. Dzīduotuoja īsoka byut aktivim i pīsadaleit interesantuos apleicejuos nūtikšonuos na tik itūnedeļ, tok ari vysu juni.  

“Vegami Mōls” Rēzeknē

“Vegami Mōls” ir jauna gordumu i izklaidis pasuokumu vīta Rēzeknē, Latgolys īlā 22. Tī var na viņ gordai, tok ari veseleigi paēst, kai ari pastuoveigai nūteik vysaidi interesanti pasuocīni. Maņ cīši pateik gordai paēst lobā atmosferā i sajimt pozitivys emocejis!

Īrostu ceļu māroj kuojom

Īsoku īt iz dorbu i nu dorba kuojom, ka tys ir īspiejams. Es dzeivoju Reigā i vysod brauču ar mašynu iz dorbu. Niu suocās vosora i munu meitu vaira navajag vest iz školu, deļtuo izdūmuoju, ka suokumā īšu kuojom divejis reizis nedeļā. Tod vāluok varbyut jau i vysys dorba dīnys. Byus agruok juosaceļ, tok byus vaira sporta! Kai ari mozuok aizmāsluota doba ar dagvīlu.

Džeza koncerts ar “Kovšu trio” Sarkaņkolnā

Pasuokumā Sarkaņkolnā apmaklātuojim byus vareiba sasatikt ar sabīdreibā zynomu laika ziņu ekspertu Tuomu Brici. Taipoš piec lekcejis varēs baudeit džeza koncertu!

Taipoš Santa ir cīši aktivs cylvāks i pīzeist, ka vyss juņs Latgolā ir pīsuotynuots ar vysaidom nūtikšonom, kurys nūteikti byutu juoapmeklej. Vīna nu taidu ir gongu nakts meditaceja Bolvūs 21. junī. Taipoš tamā pošā vokorā ari grupu “Marysana Band” varēs satikt dzeivuos muzykys konkursā “π-dzīdam” Bolvu nūvoda Upītis stadionā. Tai kai niu varim baudeit vosoru pylnā tuos plaukumā, tuos atmosferu vēļ vaira papyldynuos grupys “Marysana Band” napaseņ straumiešonys platformuos izguojušuo dzīsme “Vosora”. Santa nu sirds īsoka nūsaklauseit!