Rokstu sagataveja: portals lakuga.lv

Napaseņ izdūtuo Latvejis fotografejis klasiķa Juoņa Gleizda fotogruomota “Gleizda metode” ir tykuse finalistu sarokstā pasauļa 20 lobuokūs viesturiskūs fotogruomotu vydā “Rencontres d’Arles 2024” storptautyskajā fotogruomotu konkursā, sabīdreibu informej gruomotys izdevieju – izdevnīceibys “Orbīta” – puorstuovi.

“Rencontres d’Arles” ir kasgadejs fotografejis festivals, kas dybynuots 1970. godā Arlys piļsātā Fraņcejā. Tam ir storptautyska reputaceja atkluot īprīšk pasaulī vēļ naradzātus dorbus.

Latvejis fotografa Juoņa Gleizda fotogruomota “Gleizda metode” snādz vēļ vīnu sovpateigu muokslinīka portretu, ļaunūt skateituojam nūvērtēt juo fotografejis tehnologeju izmontuošonys meistareibu, kai ari muokslinīka īškejū spāku, teikūt golā ar sovim fiziskajim īrūbežuojumim. Kai saceits gruomotys aprokstā, izdavumā īkļautī materiali paruoda ari dziļū Gleizda rodūšuos praksis metodis i juo oficialuo dorba Traumatologejis i ortopedejis institutā saplyusšonu.

Piec apsasaļdiešonys 24 godu vacumā fotografs zaudēja obejis plaukstys. Itys dzeivis paviersīņs atvede Juoni Gleizdu iz Reigu, kur jis izturēja viertini operaceju, īsavuiceja struoduot ar speciali izgataveitim instrumentim, palyka par fotografu i, breivū laiku veļtejūt rodūšai fotografiešonai, īsavuiceja sarežgeitus fotoprocesus. 1960.–1980. godūs Juoņs Gleizda palyka par naapstreidamu fotokluba “Reiga” “skotivis” zvaigzni. Fotoklubā jis atteisteja sovu tālaineibys pasauli, pakļaunūt tū kluba kolektiva izstruoduotim nūsacejumim. Izceineitī storptautyskī apbolvuojumi i “varai nabeistamys” amateru kūpīnys statuss ļuove fotokluba bīdrim vysā breivi izalaseit temys i fotografēt ari plykys mīsys. “Laikā, kod Eiropys masu kulturys ikona Brižita Bardo dzīduoja: “Plyka zam saulis, vysā plyka,” Reigys fotoklubā radeituos teiksmainuos nimfys “saplyuda ar dobu” pļovā, pūrā voi snīgā i izaicynuoja padūmu ideolodeju,” – atzeimoj gruomotys sastuodeituoja Anna Volkova.

Fotoklubā par muokslu tyks skaiteita viņ malnboltuo fotografeja, i kruosainī Juoņa Gleizda attāli izstuodēs napasaruodeja, koč i fotografs turpynuoja pastuoveigi fotografēt ari kruosuos, eksperimentejūt ar gaismu izklīdejūšom prizmom i lācom.

Pasasokūt Latgolys Fotografu bīdreibai i taišni Igora Pliča entuziasmam, ir tykuši saglobuoti Juoņa Gleizda dorbu materiali, i itymā izdavumā ir vareiba daleji īpasazeit kai ar kruosu diapozitivu montuojumu, tai ar fotografa skicem i dorbu kontrolkopejom.

“Cylvāks i tehnologeja, doba i kultura, sīviškais i veiriškais, muoksla i amaterismys, tradiceja i revoluceja – pusi godu symta piečuok Gleizda dorbi itamā izalaseišonā aicynoj puorvērtēt binaruos kategorejis i pīduovoj arviņ jaunys analizis molys. Sevkura muokslinīka nakritiska sova veida īceļšona svātūs kuortā var draudēt ar ībaļzamiešonu i bīzu putekļa kuortu, kas naaicynoj dasadūrt. Stuovēt uorpus laika nav varams, bet puordzimt jaunā laikā i skatejumā ir privilegeja,” piecvuordā roksta Liāna Ivete Žilde.

Gruomotys izdūšonu pabaļstejs Vaļsts kulturkapitala fonds. Jei izdūta ar tekstim latgalīšu, latvīšu i angļu volūduos. Pi tekstu latgaliski struoduojušys latgalīšu rokstu volūdys specialistis Māra Mortuzāne-Muravska i Ilze Sperga.

Izdavumu “Gleizda metode” var nūpierkt gruomatneicuos  “Globuss”, ”Jānis Roze”, “Bolderāja”, kai ari interneta platformā talka.lv. Vaira par gruomotu izzynoj ITE.