Pīterdīna Rogovkā – ar jaunu ekspoziceju, pīminis šaļti i teatra izruodi
![Pīterdīna Rogovkā – ar jaunu ekspoziceju, pīminis šaļti i teatra izruodi](https://www.lakuga.lv/wp-content/uploads/2024/06/Piterdina_uzroksts-1000x667-c-default.jpg)
Rokstu sagataveja: portals lakuga.lv
Sastdiņ, 29. junī, Rēzeknis nūvoda Rogovkā nūtyks kasgadejuo Pīterdīnys svieteišona, kurā itūgod paradzāta bejušuos Zaļmuižys muižys krūgim veļteitys ekspozicejis atkluošona, pīminis šaļts pi Pītera Jurciņa kopa Desetnīkūs, amaterteatra “Bykovīši” izruode i Pītera Jurciņa pīmiņai reikuotuo literatu konkursa nūslāgums. Kai viestej nūtikšonys reikuotuoju atsyuteituo informaceja, Pīterdīnu, kurā teik gūdynuots dzejnīks, nūvodnīks Pīters Jurciņš i vysi pogosta Pīteri, nautrānīši svietej jau vaira nakai 20 godu.
Literarais konkurss, lai gūdynuotu dzejnīka, izcyluo nūvodnīka Pītera Jurciņa pīmiņu, aizasuoce 2005. godā i niu palics par īrostu kulturys nūtikšonu goda sastuovdaļu, Pīterdīnys pasuokumā Rogovkā izceļūt ari myusu dīnu literatu dorbus. Pīters Jurciņš (1932–2004) beja labi pazeistams kai dzejnīks, tai i jaunūs literatu atbaļsteituojs, bet mozuok zynoms ir fakts par jū kai scenaristu (piec Jurciņa scenareja 1973. godā topuse Reigys kinustudejis dokumentaluo kina “Klātbūtne”), deļtuo šūgod literatu konkursā kai jaunī, tai pīredzejušī literati beja aicynuoti īsnēgt da ituo napublicātus dramaturgejis dorbus latgaliski. Konkursa tyka sajimti 9 vysaidu dramaturgejis žanru dorbi i uzvarātuoji, apkūpojūt žurejis viertejumu, tiks paziņuoti Pīterdīnys pasuokumā Nautrānu kulturys nomā-sporta hallē 29. junī 19.00 stuņdēs. Lobuokūs konkursa dorbus piečuok varēs puorskaiteit latgalīšu kulturys ziņu portalā lakuga.lv. Piec literatu konkursa uzvarātuoju apbolvuošonys pasuokuma apmaklātuojim byus vareiba nūsavērt Gaigalovys amaterteatra “Bykovīši” izruodi – Hermaņa Paukša lugu “Ar spani pa golvu”. Komedeja viestej par kaidu puorprotumu, kurā slaucieja pruota pagaisšonys šaļtī īsyt deputatam ar spani par golvu, tok vyss golā teik atrysynuots breineigā veidā.
Īrosts, ka Pīterdīnā ir ari pīminis šaļts pi Pītera Jurciņa kopa Desetnīku kopsātā, kas 29. junī byus 18.00 stuņdēs. Grybātuojim pīsadaleit vysuos nūtikšonuos tiks nūdrūsynuots transports – 17.45 paradzāta izbraukšona nu Rogovkys, bet 18.45 nu Desetnīku kopu.
2024. gods Nautrānu pogostam i Rogovkai ir eipašs ar vairuokim faktim – koč ari cīma vuords rokstūs pasaruoda drupeit dreižuok, teik skaiteits, ka itūgod byus 225 nu Rogovkys suokšonuos, kod 1799. godā Rogovkā izcalta pyrmuo kūka bazneica, bet niulinejuo Nautrānu Romys katuoļu bazneica sveitej 110 godu jubileju nu īsvieteišonys 1914. godā. Taipat šūgod paīt 205 godi nu 1819. gods, kod Rogovkā izcalts pyrmais krūgs. Pyrma Pīteram Jurciņam veļteitajom nūtikšonom Pīterdīnā, 29. junī, 17.00 stuņdēs veikalā “Sils”, kas Rogovkā pi kristceļu atsarūn bejušajā krūga sātā, tiks atkluota vītejuos jaunītis Amandys Ludboržys ar latgalīšu kulturys kusteibys “Volūda” paleigu taiseituo ekspoziceja “Iz krūdzeņu gluds bej’ ceļš”, kas viesteis par sovulaik Zaļmuižys muižinīka caltajim krūgim. Ekspoziceja veikala dorba laikā iz prīšku byus apsaverama kotram interesentam i papyldynuos daīmamūs stuostu par Rogovku i tuos apleicīnis viesturi.
Iz nūtikšonom Pīterdīnā aicynoj Nautrānu apvīneibys puorvaļde i latgalīšu kulturys kusteiba “Volūda”. Literatu konkurss nūteik ar Vaļsts kulturkapitala fonda atbolstu, bet ekspozicejis eistynuošonu atbolsta Rēzeknis nūvoda pošvaļdeiba i “Volūdys” jaunīšu izaugsmis i Latgolys izzynuošonys programa “LTG tu dū!” ar Sabīdreibys integracejis fonda nu Kulturys ministrejis daškiertūs Latvejis vaļsts budžeta leidzekļu.
![](https://www.lakuga.lv/wp-content/uploads/2024/06/Piterdina_Rogovka_afisa_publ-495x700.jpg)
![](https://www.lakuga.lv/wp-content/uploads/2023/11/Lakuga_VKKF-projekts_atbolsts_logo_-620x155.jpg)