Kulturys īsacejumi nedeļai: atsagrīzt pi seve, sovu sakņu i byut saskaņā ar dobu Saulis goda ritā
![Kulturys īsacejumi nedeļai: atsagrīzt pi seve, sovu sakņu i byut saskaņā ar dobu Saulis goda ritā](https://www.lakuga.lv/wp-content/uploads/2024/06/Isacejumi_Malkevica_Grundele-1000x667-c-default.png)
Rokstu sagataveja: portals lakuga.lv
Muzeja “Ondrupinis lauku sāta” nūvodpietneica Evija Maļkeviča-Grundele aicynoj sevkuru izbaudeit ituos nedelis eipašū dobys ritmu, kod saule sasnādz sovu augstuokū punktu i apleicejuos dobys zīdiešona ir sovā kulminacejā.
20. junī – byut ar sevi dobā
Kotrs cylvāks ir dobys sastuovdaļa, kam lamts vysmoz vīnu reizi izzīdēt. Tū var dareit ari kotru godu ap vosorys saulisgrīžu laiku. Kotram vajadzātu izbreivēt laiku, kab iz vysmoz vīnu stuņdi ītu dobā, pļovā, bosom kuojom vuokt tuos zuoleitis i zaļumus, kas izrunoj. Sevkuri svātki suocās ar sasagataveišonu, i tovā vītā navar sasagatavuot nivīns cyts, kai tik tu pats! Nu ituo gods 20. juņa vokora da 23. juņa saule i gaisma sasnādz augstuokū punktu, kod ir vareiba atjaunuot sovu īškejū spāku sadarbeibā ar dobu, kurā byus vārojama zīdiešonys kuļminaceja. Zīdi kūpā ar dobu!
![](https://www.lakuga.lv/wp-content/uploads/2024/06/Evijas_Malkev_Grund_foto-620x415.jpg)
21. junī – atsagrīzt pi sovu sakņu
21. junī, ap 20.30 stuņžu, latgaliskūs tradiceju i prasmu sātā “Ambeļu skreine” jau vairuokus godus pa ailei, augstajā kolna golā ar aizraunūšu skotu, saulei mīreigi nūrītūt, kūpā saīt jauni i vaci latgalīši, kab ar dzīsmem, kūpeigom rūtaļom i daņčim pavadeitu goda eisuokū nakti, atjaunuotu senejū Saulis goda ritu gūdynuošonu i vosorys saulisgrīžu svieteišonu Latgolā. Iz itū saīšonu īrosts īsarūn tī, kam tī ir juonūīt. Nūtiks kūpeiga guņs īdegšona, skanēs latgalīšu Juoņa dīnys dzīsmis i, saprūtams, byus daņči i īšona rūtaļuos, kas naļaus aizmigt da reita gaismys.
![](https://www.lakuga.lv/wp-content/uploads/2024/05/afisa_Juoni_Ambeli-620x439.jpg)
22. junī – izgaismuot Aulejis dzeivū montuojumu
Auleja ir vīns nu eipašūs Latgolys tradicionaluos kulturys muzykys šyupeļu, nu iteinis calta gaismā na vīna viņ popularuo tautysdzīsme voi daņcs. Itamā vītā arviņ skaņ etnografiskuo ansambļa “Aulejis sīvys” bolsi, kas skaitoms par vīnu nu rešūs i vēļ arviņ uzturātūs taida veida ansambļu Latvejā. Aicynoju atbaļsteit ituos vītys atdzimšonu i 22. junī, nu 20 stuņžu, puļcētīs Aulejis estradē, kur gaideis ansamblis “Aulejis sīvyss” ar draugu folklorys kūpu “Prymačkys” nu Kruoslovys i kapelu “Speiga”. Tiks virts sīrs, byus kūpeiga tematiska dorbuošonuos, pi azara plānuots saulis pavadeišonys rituals i daņči kūpā ar Ilmāru Dreļu i Ilzi Mežnieci.
![](https://www.lakuga.lv/wp-content/uploads/2024/06/Auleja_Evijas_Malkev_Grundel_foto-620x349.jpg)
23. junī – turpynuot tradicejis ar breivdobys izruodi Ondrupinē
23. junī muzejā “Ondrupinis lauku sāta” niu jau vaira nakai 20 godu, ap 20 stuņžu, nūteik kasgadejuo amaterteatra breivdobys izruode. Itūgod tiks izspālāta luga “Lauku gurķis”, kū boguotynuos Juoņa dīnys īrūtuošonys izdareibys, skanēs folklorys kūpys “Sovvaļnīki” dzīsmis, byus rūtalis, spēlis, svātku tierdzeņš i divritiņa Juoņu nakts kruosā izlūze. Gosti piec īleiguošonys muzejā varēs turpynuot leiguošonu tīpat Ondrupinē, grīžūt daņci zaļumbalā ar grupu “Veiri laivā”.
![](https://www.lakuga.lv/wp-content/uploads/2024/06/Ondrupine_Juoni_Evijas_Malkevicas_arhivs-620x440.png)