Grupai “Triānas parks” jauna dzīsme latgaliski kūpā ar Normundu Zušu
![Grupai “Triānas parks” jauna dzīsme latgaliski kūpā ar Normundu Zušu](https://www.lakuga.lv/wp-content/uploads/2024/06/Liepu_laipas_Triana_parks_Zuss_ekransuovins-1000x667-c-default.png)
Rokstu sagataveja: portals lakuga.lv
Grupa “Triānas parks” sadarbeibā ar muziki Normundu Zušu publiciejuse jaunu dzīsmi “Liepu Laipas” latgalīšu volūdā. Dzīsmis muzykys i vuordu autore ir grupys soliste Agnese Ruozniece (Rozniece), producenti – Agnese Ruozniece i Armands Varslavāns.
Dzīsmis “Liepu laipas” video ir filmāts vairuokuos vītuos vysā Latgolā, tymā storpā ari kanipu saimisteibā “Obelisk Farm”, zemnīku saimisteibā “Liepkalns”, pi kaļva Juoņa Ļubkys, keramikys darbneicā “Pīterkolns”, zyrgu sātā “Untumi”, Fraņča Trasuna muzejā “Kolnasāta” i cytur. Taipoš dzīsmis autori izsoka pateiceibu deju kūpai “Dziga” i senioru deju kolektivam “Kūmys” horeografa Ilmāra Dreļa vadeibā.
Dzīsmis producente, muzykys i vuordu autore ir Agnese Ruozniece, producents ir ari Armands Varslavāns, video producents – “Zvaigznājs”, gitara – Artūrs Strautiņš, režisors Lauris Ābele, operators i montaža – Mārcis Ābele, gaismuotuojs Jānis Zeidaks, kamerys asistents Ansis Landorfs.
Kai stuosta dzīsmis producents Armands Varslavāns, jam dzīsme atguodynoj par dzymtū Latgolu i cylvākim, kas itū pusi padora par krītnu i sirsneigu, par vītu, kur vysod gribīs atsagrīzt. “Es pamatā pīsadaleju viņ muzykys daļā, tok, pa munam, dzīsmis klips aizvad ceļuojumā da myusu seņču i tradiceju, kas līk mums nadamierst sovys saknis. Klips ir malnbolts i tys vēļ vaira pastreipoj dzīsmis nūskaņu i viestejumu,” tai Armands Varslavāns. Cyta storpā, interveju ar Armandu skaiti ITE.
![](https://www.lakuga.lv/wp-content/uploads/2023/11/Lakuga_VKKF-projekts_atbolsts_logo_-620x155.jpg)