Vosorys saulgrīžūs folklorys kūpai “Upīte” jautra dzīsme “Rullāti”
![Vosorys saulgrīžūs folklorys kūpai “Upīte” jautra dzīsme “Rullāti”](https://www.lakuga.lv/wp-content/uploads/2024/06/fk-upite-rullati-1000x667-c-default.jpg)
Rokstu sagataveja: portals lakuga.lv
Folklorys kūpa “Upīte” kūpā ar bārnu folklorys kūpu “Upīte” kotra mieneša 21. datumā sovim klauseituojim duovoj atjaunuotu kolhoza laikūs dzīduotu dzīsmi. Vosorys saulgrīžūs jī izbur breineigu lauku idilli, jautrā i saulainā videoklipā dzīsmei “Rullāti”, kū lauka pietejumūs pīraksteja pi teiciejis Līvijis Supis.
Jau vaira nakai godu folklorys kūpa “Upīte” apzynoj i atjaunoj Upītis kulturtelpā i tuos apleicīnē kolhoza laikūs dzīduotuos dzīsmis. Salaseits jau vaira par 200 dzīšmu, nu kurūs kotra mieneša 21. datumā teik publicāta jauna dzīsme, kai ari tuos videoverseja. Junī folklorys kūpa “Upīte” izalaseja duovuot dzīsmi “Rullāti”, kurū pīraksteja Bolvu nūvoda Škilbānu pogostā pi teiciejis Līvijis Supis.
Bolvu nūvoda Namaterialuos kulturys montuojuma centra “Upīte” direktors Andris Slišāns soka: “Vosorys saulgrīži ir magisks laiks, kod dobā ir vysmozuok tymsys i vysvaira gaismys, itymā laikā juouzjam energeja, kū mums syuta saule, doba. Prūtams, jautra dzīsme tik paleidz dabuot leluoku baudejumu. Turim nūceju, ka taišni ituos dzīsmis pavadeibā daudzi puori laissīs meklēt papardis zīda, kas jau cytugod martā rezuļtēsīs ar breineigu mīlesteibys augli.”
Folklorys kūpa “Upīte” atjaunuotuos dzīsmis publicej, suocūt nu 2023. gods novembra. 21. novembrī tyka prezentāta pyrmuo dzīsme “Kara laukā”. 21. decembrī tika dāvināta klausītājiem jauna dziesma “Kod īt iz balli”. 21. janvarī tyka prezentāta dzīsme “Brigaders”. Februarī tyka duovuota Līvijis Supis teiktuo ukraiņu tautys dzīsme “Marička”. Martā – dzīsme disko skaņuos “Ak, dzeive”, sovutīs aprelī tyka duovuota dzīsme “Žīguļi”. Majā tyka prezentāta Natālijis Smuškys teiktuo dzīsme “Lūgšana”. Junī teik duovuota dzīsme “Rullāti”. Folklorys kūpa soka paļdis par atbolstu Vaļsts kulturkapitala fondam.
Īroksts tyka veikts studejā “Bigmaar’s Records”, bet video verseju dzīsmei taiseja “Waltz Visuals” kūpā ar video režisori Kati Slišāni. Video pīsadola FK “Upīte” i bārnu folklorys kūpys “Upīte” dalinīki.
Folklorys kūpa “Upīte” dybynuota 2002. godā, atteistūt Upītis bārnu folklorys kūpys, kas dybynuota 1980. godā, darbeibu. Da ituo FK “Upīte” ir izdavuse jau četrus albumus: “Vusi ļauds breinovuos”, “Dzīduot muoku, doncuot muoku”, “Ryugts” i “Padzīdam i…”. Kūpa aktivi pīsadola vysaidūs Latvejis festivalūs i nu 2016. goda Latveju puorstuov ari vysaidūs storptautyskajūs festivalūs vysā Eiropā – Leitovā, Igaunejā, Pūlejā, Itālejā, Čehejā, Rumanejā, Portugalē, Slovakejā, Fraņcejā, Kosovā, Boltkrīvejā.
![](https://www.lakuga.lv/wp-content/uploads/2023/11/Lakuga_VKKF-projekts_atbolsts_logo_-620x155.jpg)