Ar saulis ritualim i varonu tierguošonūs aizvadeits Lelais latgaļu tiergs
![Ar saulis ritualim i varonu tierguošonūs aizvadeits Lelais latgaļu tiergs](https://www.lakuga.lv/wp-content/uploads/2024/06/Lelais_ludzys_tiergs_2024_Daiga_Laizane-7-scaled-1000x667-c-default.jpg)
Rokstu sagataveja: portals lakuga.lv
Lelais latgaļu tiergs ir kasgadeja nūtikšona, tok itūgod tei beja pavysam eipaša, kam piec ilguoka puortraukuma tiergs atsagrīze Ludzys piļsdrupu laukumā. Ludzys piļsdrupys iz vairuokim godim tyka slāgtys plotom apmaklātuoju plyusmom deļ rekonstrukcejis dorbu, kuru laikā tyka konservātys piļsdrupys, veikta arheologiskuo izpiete i sataiseita jauna skotu platforma.
Tierga idejis autore i ilggadejuo organizatore Līga Kondrāte, kura ir ari Ludzys nūvoda Turysma centra vadeituoja, stuosta: “Itūgod beja dyžan lobs pasuokums! Beja cīši labi, ka izadeve saglobuot gona lelu plašumu, lai piļskolnā nabyutu ļaužu burzmys. Vystik, koč ari burzmys nabeja, pīsadaleja aptyvai 120 tierguotuoju! Varēja īsaguoduot piļneigi vysu – uodys izstruoduojumus, šmukus akmiņu putynys kai dekorus, kleitys, adejumus, keramikys izstruoduojumus, i, prūtams, vysu īspiejamū ādamū! Mums beja ari ukraiņu ļauds, kuri vuoreja ēst, taipoš ari Bārnu i jaunīšu centrs ruodeja sovys kulinarejis prasmis, beja ari vairuokys meistardarbneicys, kur interesanti laiku pavadeja kai saimis, tai i individualī apmaklātuoji. Kai ludzuonīte drūsai varu saceit, ka beja ari daudz jaunu seju, tys nūzeimoj, ka ari ļauds nu cytu nūvodu beja sabraukuši gona lelā daudzumā.”
Vīna nu pasuokuma apmaklātuoju beja ari Latvejis Radejis Latgolys studejis multimedeju specialiste Daiga Laizāne, kura, dolūtīs sovuos sajiutuos par pasuokumu, soka: “Maņ Ludzā saīt byut gona reši, deļtam vysleidza ir prīca tī nūbraukt. Zynūt, kai piļskolns izavēre īprīšk, niu vyss ir vaira sakuortuots, kas ir forši. Es iz pasuokumu brauču, kab sagiut svātku, Juoņu dīnys sajiutu, i tys ari izadeve – kai ar vaiņuku peišonys darbneicu, tai ar dzīsmem i daņčim, ar vareibu satikt draugus i vītejūs amatnīkus. Drūsai viņ pats tiergs varātu byut pat vēļ leluoks, vystik ari taipat beja vareiba īsaguoduot vysaiduokus produktus i precis. Ka nadaudz dasakaseit, tod cytugod byutu labi, ka organizatori pastateitu nūruodis iz dažaidom pasuokuma zonom, pīmāram, iz tiergu, iz koncertu, iz labīreiceibom i tamleidzeigai, tok kūpumā, pa munam, pasuokums beja izadevs!”
Galerejis autore: Latvejis Radejis Latgolys studejis multimedeju specialiste Daiga Laizāne
![](https://www.lakuga.lv/wp-content/uploads/2023/11/Lakuga_VKKF-projekts_atbolsts_logo_-620x155.jpg)