Kaidys sarunys ap latgalīšu volūdu i Latgolu gaidomys festivalā “Lampā”
![Kaidys sarunys ap latgalīšu volūdu i Latgolu gaidomys festivalā “Lampā”](https://www.lakuga.lv/wp-content/uploads/2024/07/sarunu-festivals-lampa-1000x667-c-default.jpg)
Rokstu sagataveja: portals lakuga.lv
5. i 6. julī Ciesīs gaidomys pruota asynuošonys i redzislūka paplašynuošonys svineibys: jubilejis – dasmytū – godu nūtiks sarunu festivals “Lampa”. Diveju dīnu garumā 247 reikuotuoji 62 nūtikšonys vītuos ar vaira nakai 363 pasuokumim diskutēs i par itūšaļt, i myužeigai aktualom temom vysvysaiduos nūzarēs. Vairuokys diskusejis byus veļteitys ari latgalīšu volūdai i Latgolai.
Mozūs volūdu vareibys
5. julī 14.00 stuņdēs nūtiks diskuseja “Mazas valodas, lielas iespējas? Latgaliešu, sāmu un jaunnorvēģu valodas”. Tamā raudzeis izzynuot, kaida ir navaļstiskūs organizaceju lūma volūdys politikys veiduošonā. Kū tom izadevs panuokt volūdys lītuotuoju tīseibu aizsardzeibā? Kaids ir tūs potencials iz prīšku Latvejā, Norvegejā i puorejuos Zīmeļvaļstīs? I kū mes varam vuiceitīs nu Zīmeļvaļstu pīredzis attīceibā iz mozuok lītuotūs i pat apdraudātūs volūdu aizsardzeibu? Diskuseju vadeis kulturvītys “Volūdu sāta” leidzdybynuotuojs i pasnīdziejs Snorre Karkonens-Svensons, tamā pīsadaleis puorstuovi nu Īvara Osena muzeja Norvegejā, Veru instituta Igaunejā, kai ari profesore Sanita Martena nu Rēzeknis Tehnologeju akademejis. Vaira par diskuseju var izzynuot ITE. Tai varēs sekuot leidza ari tīšraidē.
![](https://www.lakuga.lv/wp-content/uploads/2024/07/449318855_880213494131338_7780174339161316967_n-620x325.jpg)
Muzeji i mozuok lītuotuos volūdys
5. julī 19.30 stuņdēs reizē nūtiks i saruna “Muzejs kā iespējotājs: mazāklietotu valodu gadījums”, i virtualuos izstuodis “Linguapolis” atkluošona. Jaunnorvegu volūdys lītuotuoji Norvegejā, frizu volūdys runuotuoji Nēderlandē, kašubi Pūlejis zīmeļūs, veru runuotuoji Igaunejis dīnavydūs, kai ari latgalīši Latvejā. Mozuok lītuotuos volūdys i kūpīnys, kas tuos lītoj, myusu dīnu globalizacejis laikmatā sasastūp ar na mozumu izaicynuojumu volūdys saglobuošonā, lītuošonā i populariziešonā. Kai īspiejuot volūdys lītuotuojus i kaida lūma var byut muzejim, popularizejūt mozuok lītuotys volūdys? Par tū diskutēs kulturvītys “Volūdu sāta” leidzdybynuotuojs i pasnīdziejs Snorre Karkonens-Svensons, Īvara Osena muzeja Norvegejā saturyskuos atteisteibys vadeituoja Tūne Šlēnēsa i latgalīšu kulturys kusteibys “Volūda” vadeituoja Edeite Laime. Sarunu vadeis volūdneica, tulkuotuoja, redaktore i lektore Aiga Veckalne. Vaira par diskuseju var izzynuot ITE.
![](https://www.lakuga.lv/wp-content/uploads/2024/07/1300-192574952-500x500-1.png)
Kai volūdom izdzeivuot?
Kai īspiejams, ka 9 miļjonu vaļstī Boltkrīvejā tuos volūdys – boltkrīvu – liktiņs ir apdraudāts? Kū vīns nu ūtra var vuiceitīs boltkrīvi, latvīši, lībīši i latgalīši? Tū 6. julī 18.15 stuņdēs raudzeis saprast Latgolys sabīdryskais darbinīks i politiks Jurs Viļums, LU Lībīšu instituta direktors i vodūšais pietnīks Valts Ernštreits, muziks, viesturnīks i raidejumu vadeituojs Arņs Slobožanins i cylvāktīseibu aizstuove Alina Nahornaja. Sarunu vadeis digitaluo satura veiduotuoja Vladislava Romanova. Vaira par diskuseju var izzynuot ITE.
![](https://www.lakuga.lv/wp-content/uploads/2024/07/1171-361129102-500x500-1.png)
Eseju konkursa dasacejums
5. julī 13.00 Cāsu izstuožu nomā tiks dasaceits 5. eseju konkurss školānim i studentim “Es un Eiropas Savienība”, kurā dorbus varēs īsnēgt igauņu, latgalīšu, latvīšu, leitovīšu, lībīšu voi ukraiņu volūdā. Pasuokumu vadeis advokats i lektors Lauris Liepa, tamā pīsadaleis Publiskūs tīseibu instituta direktors Arvīds Dravnieks, Eiropys Parlamenta deputats Ivars Ijabs, žurnala “Jurista Vārds” golvonuo redaktore Dina Gailīte, LU profesore puorvaļdis i administracejis jūmā Iveta Reinholde, jurists Agris Bitāns, organizacejis “Sievietes drošībai” vaļdis prīšksādātuoja Sigita Struberga, školotuoja Baiba Atmane, studente nu Rēzeknis Ieva Puzirevska, Eiropys Kusteibys Latvejā prezidents Andris Guobiņš i Eiropys Komisejis puorstuovnīceibys Latvejā vadeituoja Zane Petre. Vaira par pasuokumu var izzynuot ITE. Tys byus daīmams ari tīšraidē.
Diskusejis par Austrumu rūbežu
Sarunu festivalā “Lampa” itūgod eipaša viereiba veļteita Austrumu rūbeža vaicuojumam. 5. julī 14.00 stuņdēs nūtiks diskuseja “Austrumu robeža. Mūsu valsts drošība – vārdi un darbi”, kuru vadeis konta “MontaTalksSecurity” veiduotuoja Monta Zaumane, bet tamā pīsadaleis īšklītu ministrs Rihards Kozlovskis, aizsardzeibys ministrs Andris Sprūds, LVRTC vaļdis prīšksādātuojs Girts Uozuols (Ozols), VAS “Valsts nekustamie īpašumi” vaļdis lūcekle Jelena Gavrilova i Vaļsts rūbežsardzis generaļs Juris Martukāns. Vaira par diskuseju var izzynuot ITE, tei byus daīmama ari tīšraidē.
Sovutīs 5. julī 16.30 stuņdēs byus ari diskuseja par Austrumu pīrūbežu – “Austrumu pierobeža – izaicinājumi un risinājumi”. Tamā meklēs atbiļdis iz treis vaicuojumim. Kaida ir kara Ukrainā radeituo ītekme iz Latvejis Austrumu pīrūbeža regionu? Kaids atbolsts vajadzeigs Austrumu pīrūbeža atteisteibai, t.sk. divejaiduo lītuojuma infrastrukturys atteisteibys vareibys? Kaida ir kotra puorvaļdis leimiņa lūma atbolsta pīsaistē – tuoluokī sūli? Diskuseju vadeis raidejuma “Digitālās brokastis” veiduotuojs i pasuokumu vadeituojs Artis Uozuoliņš (Ozoliņš), tamā pīsadaleis bīdreibys “Cita Daugavpils” vaļdis lūcekle Diāna Soldāne, SIA “Safira L” vaļdis prīšksādātuoja Lienīte Litavniece, SIA “Ernst&Young Baltic” puorstuovs Atis Migals, Hrubešovys pošvaļdeibys Pūlejā prīšksādātuoja Marta Majevska, 14. Saeimys deputate i dzejneica Anna Rancāne, Norvegejis Pošvaļdeibu asociacejis puorstuove Elita Cakule, VARAM vaļsts sekretara vītneica regionaluos atteisteibys vaicuojumūs Ilze Uoša (Oša) i Augšdaugovys nūvoda izpiļddirektors i Daugovpiļs dūmis deputats Pēteris Dzalbe. Vaira par diskuseju var izzynuot ITE.
Daugovpiļs diskuseja i izruode
6. julī 15.30 stuņdēs paradzāta diskuseja par Latgolys leluokū piļsātu – “Daugavpils. Pilsēta uz robežas”. Voi tī eistyn vyss ir tik nalabi? Kai mazynuot Krīvejis propagandys ītekmi i styprynuot piļsātys dzeivuotuoju pīdareibys sajiutu Latvejai? Kai veicynuot piļsūniskū sabīdreibu? Kū jau niu dora vaļsts i sabīdryskuos organizacejis? Par tū “Providus” direktore i vodūšuo pietneica Iveta Kažuoka runuos ar “Chayka latviski” žurnalisti Annu Luīzi Ruskuli, bīdreibys “Krievu balss Latvijai” vaļdis lūcekli i projektu vadeituoju Sergeju Kalininu, 14. Saeimys deputati Leilu Rasimu, bīdreibys “New East” vadeituoju Jorenu Dobkeviču i bīdreibys “Cita Daugavpils” puorstuovi Ingu Belousu. Vaira par diskuseju var izzynuot ITE.
Sarunu festivala “Lampa” laikā – 5. julī 20.00 stuņdēs varēs pīdzeivuot ari Daugovpiļs breivūs muokslinīku grupys veiduotu monoizruodi “Cilvēks un tirāns”, kurā caur eksperimenta prizmu tiks pieteitys socialuos pamatvierteibys: breivuo gryba i izvēle, personeiguo breiveiba, tīseibys iz varu i kontroli, naids i nažieleiba. Izruodi veidoj bīdreiba “New East”, tuos rodūšajā komandā ir Jorens Dobkevičs, Marina Ivanova, Vadims Bogdanovs i Eduards Beļnikovs. Vaira par izruodi var izzynuot ITE, tū varēs vērtīs ari tīšraidē.
Taipat ar Daugovpiļs pīredzi diskusejā “Pāreja uz mācībām latviešu valodā: pirmais gads” daleisīs Daugovpiļs Vaļstspiļsātys vydsškolys direktors Ilmārs Zučiks. Par diskuseju, kas nūtiks 5. julī 17.00 stuņdēs vaira par izzynuot ITE, tū varēs vērtīs ari tīšraidē.
Latgolys zemnīki i jaunīši
Aktivi latgalīši atrūnami ari vairuoku cytu diskuseju daleibnīku vydā. Pīmāram, Baļtinovys pusis zemnīks Elvis Bartkevičs pīsadaleis diskusejā “No pastalām uz traktoru – pārprastais zemnieks”, students i jaunais literats nu Rudzātu – Dāvids Rubens – byus diskusejis i pruota vātrys “Jauniešu “ceļa karte” uz mājām – reģionu pievilkšanas (ne)spēks” dalinīks, bet Leivuona pusis bīdreiba “riktīgi NAISS” organizej sovu diskuseju “Pats savas dzīves PREZIDENTS”.
![](https://www.lakuga.lv/wp-content/uploads/2023/11/Lakuga_VKKF-projekts_atbolsts_logo_-620x155.jpg)