Kulturys īsacejumi nedeļai: baudeit muokslu, sadoncuot, paskaiteit latgaliski i apbraukuot Rēzeknis nūvodu
![Kulturys īsacejumi nedeļai: baudeit muokslu, sadoncuot, paskaiteit latgaliski i apbraukuot Rēzeknis nūvodu](https://www.lakuga.lv/wp-content/uploads/2024/07/isacewjuni-1000x667-c-default.png)
Rokstu sagataveja: portals lakuga.lv
Irbe Bārbala Kārkliņa ir rodūša jaunīte nu Rēzeknis nūvoda i folklorys kūpys “Vīteri” dalineica. 29. junī, Pīterdīnā, Irbe kai jaunuokuo dalineica Pīteram Jurciņam veļteitajā literatu konkursa nūslāguma pasuokumā sajēme atzineibu par pīsadaleišonu konkursā i naudys bolvu nu Rēzeknis nūvoda Nautrānu apvīneibys puorvaļdis par dorbu “Es, klavīris i mama”, kai ari dabuoja Latgalīšu volūdys, literaturys i kulturviesturis školuotuoju asociacejis specbolvu. Lugu piečuok variesi puorskaiteit portalā, tok niu īsaver, kū Irbe tev īsoka sadareit itamā nedeļā!
![](https://www.lakuga.lv/wp-content/uploads/2024/07/P.Jurcena_Konkursa_Nuslagums_Foto-Amanda_Anusane-12-620x413.jpg)
Sadoncoj
Īsavuici kaidu daņci kūpā ar saimi i draugim. Tam paleidzēs daņču gruomota “Bērnu danči un ne tikai” i disks “Ak tī, jandālī”, kas ir izdūti sadarbeibā ar folklorys draugu kūpu “Vīteri”. Vaira par gruomotu ITE.
![](https://www.lakuga.lv/wp-content/uploads/2024/07/irbe-barbala-525x700.jpeg)
Apbraukoj Rēzeknis nūvodu
Nedeļgolā nūej iz kaidu nu Rēzeknis nūvoda dīnu pasuokumim. Es pati spieļuošu kūkli i dzīduošu 12. juļa koncertā Leņdžūs, bet 14. julī byušu Drycānūs kūpā ar Kroma kolna bruolisti. Ituos nūdarbis man paleidz sajust sovys saknys, byut tyvu kluot senejim latgalim, uzvalkūt arheologiskū tārpu un dabojūt breiveibu nu kasdīnys pīnuokumu, i audzēt spuornus, apsazynojūt sovu latgaliskū identitati, dzīdūt latgalīšu tautys dzīsmis i spielejūt etnogrāfiskū muzykys instrumentu – kūkli. Vysa nūvoda dīnu programa ITE.
![](https://www.lakuga.lv/wp-content/uploads/2024/07/WhatsApp-Image-2024-06-30-at-19.38.07-620x349.jpeg)
Baudi muokslu Lūznovā
13. julī nūteikti ir juonūbrauc iz Lūznovys muižu, iz Muokslys pikniku. Tys ir pīdzeivuojums, kurs ilgi palīk atmiņā. Vaira informacejis par pasuokumu ITE.
![](https://www.lakuga.lv/wp-content/uploads/2017/06/Luznavas-muiza_pikniks-01-foto-Raimonds-Kalva-fotolatgale.lv_.jpg)
Skaiti latgaliski
Izskaiti kaidu gruomotu latgaliski. Tai kai muna mama, Meldra Gailāne, niu gatavej jaunu gruomotu par luocānu Meikuleņu, es skaiteišu juos pyrmū gruomotu “Meikuleņš īpazeist omotus” i gaideišu jaunū gruomotu. Ka navari atrast gruomotu latgaliski, vari aizīt iz Rēzeknis Bārnu biblioteku, tī ir!
![](https://www.lakuga.lv/wp-content/uploads/2023/11/Lakuga_VKKF-projekts_atbolsts_logo_-620x155.jpg)