Rokstu sagataveja: portals lakuga.lv

Nu 30. juļa da 2. augusta Modūnis nūvoda Borkovā jau trešū reizi nūtiks kapelmeistaru vuiceibys, kas nūsaslēgs ar muziciešonu 23. tautys muzykantu svātkūs, informej Tautys muzykantu bīdreibys vadeituoja Iveta Dukaļska.

3. kapelmeistaru vuiceibom da 10.  juļa var dasasaceit tautys muzykys grupu, kapelu vadeituoji i muzykanti, kai ari individualī interesenti (vacumā nu 18 godim), kuri muok spielēt vysmoz vīnu muzykys instrumentu. Iveta Dukaļska nūruoda, ka īprīškejūs diveju godu pīredze līcynoj, ka četru dīnu vuiceibys ir nūdereigys pīredzis apmaiņai, pylnveidojūt i sovys muziciešonys prasmis, i boguotynojūtīs nu pietnīku i cytu tautys muzykantu. Piec vysaidu kūpmuziciešonys praktiskūs nūdarbeibu kūpā ar cytim sadarbeiba turpynojās ari piec vuiceibu.

3. kapelmeistaru vuiceibuos etnomuzikologs Valdis Muktupāvels stuosteis par instrumentalū kūpmuziciešonu, analizejūt kontekstus i sastuovu, bet lektore Iveta Dukaļska stuosteis par muziciešonu kuozuos i kū nūzeimoj byut kuozu muzykantam. Saksofonists i aranžātuojs Artis Gāga īsadzilinuos improvizacejā vysaidūs muzykys žanrūs, apsaverūt tuos izmontuošonu kai tradicionalajā, tai klasiskajā muzykā, popmuzykā i džezā. Etnomuzikologe Liene Brence pīsavērss aranžiešonys pamatim kapelu muziciešonā, analizejūt instrumentu lūmu kapelu sastuovā, saspēlis pajiemīņus, harmoneju, ritmiziešonu, variiešonu i improvizaceju, taipat Liene īpazeistynuos ar dažaida notu materiala raksteišonu datorprogramā “Musescore”. Latvīšu horeografiskuos dejis eksperte Dace Smirnova analizēs tautys dejis muzyku, bet lektore Kristīne Tjarve īsaceis lobuokūs komunikacejis pajiemīņus muzykantu grupai. Sovutīs vokorūs kūpeigajā muziciešonā sovā pīredzē daleisīs i kapelys “Dziga” vadeituoja Dace Baltkāje, i kapelys “Zeidi” vadeituoja Dace Smirnova.

3. Kapelmeistaru vuiceibom var dasasaceit, aizpyldūt dasacejumu ITE.

Kai īrosts, kapelmeistaru vuiceibys Borkovā nūsaslēgs ar kūpeigu muziciešonu 23. tautys muzykantu svātkūs, kas nūtiks 2. i 3. augustā. 2. augustā skanēs svātku atkluošonys koncerts, kas ritmiski puorīs daņču vokorā. Sovutīs 3. augustā tautys muzykantu svātki turpynuosīs ar etnomuzikologa Oskara Patjanko meistardarbneicu “Ermoņikas un to loma instrumentu sastāvā”, piec tuo byus instrumentu maiņa i izruodeišona, taipat svātku laikā byus apsaverama ari garmaņu izstuode nu muzykantu privatūs kolekceju. Sastdiņ skanēs ari individualūs muzykantu koncerts i pyrmū reizi nūtiks konkurss individualajim muzykantim, kur lobuokī sajims skateituoju simpateju i organizatoru bolvys. Tautys muzykantu svātku nūslāgumā izskanēs dyžais koncerts, kurā muzicēs na viņ Latvejis, bet ari Leitovys i Igaunejis tautys muzykys grupys, individualī muzykanti i kapelys.

Individualī tautys muzykanti i muzykantu grupys 23. tautys muzykantu svātkim Borkovā vēļ var dasasaceit leidz 14. juļam, aizpyldūt dasacejumu ITE.