Latvejis Radeja izsludynoj konkursu raidīroksta latgaliski taiseišonai
![Latvejis Radeja izsludynoj konkursu raidīroksta latgaliski taiseišonai](https://www.lakuga.lv/wp-content/uploads/2024/07/pici-breinumi-konkurss-1000x667-c-default.jpg)
Rokstu sagataveja: portals lakuga.lv
Latvejis Radejis Latgolys multimedeju studeja aicynoj jaunūs talantus da 5. augusta dasasaceit konkursam raidīroksta latgalīšu volūdā “Pīci breinumi” taiseišonai jaunajā rudiņa sezonā, informej radejis puorstuove Monta Hildebrante.
Konkursa mierkis ir caur raidīrokstu popularizēt latgalīšu volūdu, veiduot jaunīšu auditorejai atbylstūšu i interesantu saturu jim ārtā formatā, kai ari atkluot i pīsaisteit jaunus talantus raidīrokstu taiseišonā i snēgt vareibu regiona jaunīšim veiduot izgleitojūšu i diskusejis rodūšu saturu par regionam i sabīdreibai nūzeimeigim tematim.
“Daži jaunīši piec raidīroksta “Pīci breinumi” taiseišonys izalaseja žurnalistikys studejis. Cyti nūstyprynuoja latgalīšu volūdys zynuošonys voi drūsmi i pošpuorlīcynuoteibu, kai ari atkluoja sevī cytys eipašeibys i talantus. “Pīci breinumi” ir koč kas vaira par vīnkuorši raidejumu voi raidīrokstu. Tei ir rodūšu, uzjiemeigu i sovā vydā atbolstūšu jaunīšu grupa, kas popularizej regionu, kur jī dzeivoj, volūdu, kurā runoj, atteista talantus i īdvasmoj cytus,” soka Latvejis Radejis Latgolys studejis vadeituoja Renāte Lazdiņa.
Sešu pastuoviešonys godu laikā raidīroksta i ari Latvejis Radejis 5 raidejuma ar taidu pošu nūsaukumu “Pīci breinumi” taiseišonā īsasaistejuši jaunīši nu Latgolys, dolūtīs ar sovu pīredzi, dūmom i interesantom nūtikšonom, sasarunojūt ar cytim regiona jaunīšim, muzikim, muokslinīkim, eksperimentejūt, izaicynojūt cytus i puorbaudūt poši sevi. Apgiuts ir vysvysaidu temu lūks, suocūt ar hobejim, veseleigu dzeivis veidu, profesionalū kasdīnu, leidz pat puordrūsim sapynim i baismeigom atkluosmem.
Konkursa dalinīkim juoīsnādz plānuotuo raidīroksta idejis i tehnologiskuo rysynuojuma aprokstu, kai ari vīnys serejis aptyvu scenareju, potencialūs raidīroksta izplateišonys i vierzeišonys kanalus i pretendenta bolsa audio voi video īrokstu. Vysa informaceja par konkursa nūsacejumim daīmama ITE.
![](https://www.lakuga.lv/wp-content/uploads/2023/11/Lakuga_VKKF-projekts_atbolsts_logo_-620x155.jpg)