Ari itūgod “lipa kustēs” Bolvu nūvodā
![Ari itūgod “lipa kustēs” Bolvu nūvodā](https://www.lakuga.lv/wp-content/uploads/2024/07/Lipa_kust_FB_2024-1000x667-c-default.png)
Rokstu sagataveja: portals lakuga.lv
Storptautyskais folklorys festivals “Lipa kust” ir tradicionala Bolvu nūvoda nūtikšona, kas teik svieteita kotru ūtrū godu. Itūgod festivals nūtiks jau catūrtū reizi i īsasuoks 27. julī Baļtinovā, turpynuosīs 31. julī Bolvu Kulturys i atpyutys centrā, 1. augustā – Namaterialuos kulturys montuojuma centrā “Upīte”, 2. augustā – Viļakys Vyssvātuos Jezus sirds Romys katuoļu bazneicā, bet nūsaslēgs 3. augustā Upītē.
Storptautyskajā folklorys festivalā pīsadaleis dalinīki nu Latvejis, Čehejis, Gruzejis i Kostarikys. Pasuokumi nu 27. juļa da 3. augusta nūtiks Upītē, Baļtinovā, Bolvūs i Viļakā. Nu Latvejis dalinīku vydā byus folklorys kūpa “Upīte”, folklorys kūpa “Rekovas dzintars”, deju kūpa “Nebēda” i deju kūpa “Olysta”.
Andris Slišāns, kurs ir vīns nu festivala organizatoru, ar entuziasmu stuosta, ka tymā byus vareiba daudz muzicēt i pīsadaleit doncuošonys meistardarbneicuos. Andris ari pastreipoj, ka “Lipa kust” cytu Latvejis festivalu vydā atsaškir ar eipašū kūpeibys sajiutu, kaidu organizatori snādz dalinīkim. Ir daži publiskī koncerti, tok vēļ vaira asūt vysaidu meistardarbneicu i sasadorbuošonu sovā vydā, kur vīnys vaļsts puorstuovi vuica cytys vaļsts puorstuovus.
Itūgod festivals ir eipašs ari ar tū, ka daļa nu nūtikšonu puorsakluoj ar muzykys festivalu “Osvalds”, kurs itūgod ari byus Baļtinovā (sarunu ar “Osvalda” organizatoru skaiti ITE).
![](https://www.lakuga.lv/wp-content/uploads/2024/07/Lipa_kust_FB_2024_03-495x700.jpg)
![](https://www.lakuga.lv/wp-content/uploads/2023/11/Lakuga_VKKF-projekts_atbolsts_logo_-620x155.jpg)