Rokstu sagataveja: portals lakuga.lv

17. augustā nu 10.00 da 15.00 stuņžu A. Pumpura skverā, Daugovpilī, nūtiks jau par tradiceju palykušais pasuokums “Salds kā medus, stiprs kā ķiploks” aba Mada i casnāgu svātki, viestej publiski daīmamuo informaceja. Itūgod tamā apmaklātuojus ar muzykalim prīšknasumim prīcynuos ansamblis “Sipisnīks ar madu”, grupa “Latgalīšu reps”, kai ari akters Jānis Paukštello ar koncertprogramu “Latgales medus toņos”.

Kai īrosts, naatjemama pasuokuma sastuovdaļa ir mada, biškūpeibys produktu, casnāgu i tūs izstruoduojumu tierdzeņš i degustaceja, kai ari koncertprograma. Itūgod tū 10.00 stuņdēs aizsuoks ansamblis “Sipisnīks ar madu” (Laura Svikša (vokals, tausteņinstrumenti), Antra Toporkova (vejūle, kūkle, vokals), Haralds Meiers (gitara), Mārcis Lipskis (basgitara)). Muzikus vīnoj na tik mīlesteiba pret muzyku, tok ari tys, ka jim vysim garšoj sipisnīks ar madu, nu kuo ari radīs grupys nūsaukums. 11.15 stuņdēs koncertprogramu turpynuos originalu muzykys instrumentu, pīmāram, diveju metru garys trompetis, četrus metrus gara alpu roga i cytu pošizdūmuotu instrumentu izpiļdeituojs Vairis Nartišs ar sovu instrumentalū izruodi “PŪT un PRIECĀJIES”.

12.30 stuņdēs iz skotivis kuops tautā īmeiļuotais akters i dzīduotuojs, kurs naseņ nūsvietejs sovu skotivis gaitu 50 godu jubileju – Jānis Paukštello. Sovā koncertprogramā “Latgales medus toņos” muokslinīks izdzīduos sirsneiguokuos dzīsmis i izrunuos meiļuokūs vuordus itam nūvodam. Sovutīs 13.45 stuņdēs koncertu vērtini nūslēgs grupa “Latgalīšu reps”. Apvīneibys dailradi pīpylda plota spektra dzīsmis vysaidūs muzykys stylūs – suocūt ar klauseituoju īmeiļuotim balleišu hitim “Žārej gali”, “Latgalita”, beidzūt ar “Nav buobu, nav osoru” i “Trešuo zvaigzne”.

Pasuokuma programu papyldynuos ari izklaidis bārnim i pīaugušajim – “Mobilais spēļu parks”, foto styureits nu “Sveņtis lavandom”, kruosainī smiļkšu zeimiejumi “Colorit”, pierts slūtu sīšonys meistarklase i pierts rituali, kai ari Z/S “Kurmīši” zuoļu čaju degustaceja.