Rokstu sagataveja: Laura Spundere, portals lakuga.lv

13. julī pi fotomuokslinīka i fotoviesturnīka Igora Pliča tyka atkluota puorveiduotuo i uzlobuotuo fotografa Juoņa Gleizda pīminis ustoba. Projektu eistynuoja Latgolys fotografu bīdreiba sadarbeibā ar Preiļu nūvoda pošvaļdeibu i Igoru Pliču, kurs ari da šam beja turējs ryupi par Juoņa Gleizda montuojumā atstuotim dorbim i prīškmatim.

Pīminis ustobys atkluošonā fotografs Igors Pličs pīmineja gadīni, kod aptyvai pyrma diveju godu Preiļu viesturis i lītiškuos muokslys muzeja vadeituoja asūt jam pasacejuse, ka juo tuo laika Juoņa Gleizda pīminis ustoba naatbiļst 21. godu symta standartim. Pličs pastreipuoja, ka jis par taidu komentaru nabyut nav apsavainuojs, tok tei asūt kolpuojuse kai pyrmuo īrūsme, ka nazkas byutu juopamaina.

Gleizda pīminis ustobys konceptu veiduojuse uzjāmuma “H2E” eipašneica Inguna Elere, kura izstruoduoja izvītuojumu, kruosu tūņus, mebelis i tt..

Dorbim nūsaslādzūt, niu ir īreikuota myusdīneiga, muzeja kruojuma globuošonai atbylstūša fotografa Juoņa Gleizda pīminis ustoba. Ekspozicejā aizraunūšā stuostā plotuokai sabīdreibai ir daīmama muokslinīka dailrade, dzeive, dorbi, taidā veidā teik saglobuots ari Latvejai i Latgolai nūzeimeigs kulturys montuojums, sovā viestī pastreipoj Preiļu nūvoda pošvaļdeiba. Svareigi, ka zynuotnīkim i studentim niu ir ari nūdrūsynuota literatura par fotografejis nūzari zynuošonu i redzislūka paplašynuošonai.

Sovā uzrunā Preiļu nūvoda Turysma atteisteibys i informacejis centra vadeituoja Zane Pranevska pastreipuoja, ka fotografs Juoņs Gleizds par sovom prasmem i dorbim sajiems aptyvai 600 gūdolgu i 170 medaļu vysūs pasauļa kontinentūs. Jei ari pasasaceja fotomuokslinīkam Igoram Pličam, kurs daudzu godu garumā ir vuocs i saglobuojs Juoņa Gleizda pīminis lītys i dorbus. Ustobu tuos atkluošonā svieteja Preiļu Romys katuoļu draudzis prīsters Juoņs Stepiņš.

Sovpus pats Igors Pličs pīminis ustobys atkluošonā Juoni Gleizdu raksturuoja cīši kūduleigai – pasauļa breinums, Latvejis gūds i Latgolys lapnums. Gleizda pīminis ustobā apsaverams lels skaits ar fotografa dzeivi i dorbu saisteitu materialu, tymā storpā ari 1950. godu kinys, kur radzams, kai fotografs struoduojs i dorbuojīs, Treju Zvaigžņu ordiņs i cyti prīškmati.

Juoņa Gleizda pīminis ustoba atsarūn Preiļūs, Raiņa bulvarī 9, apsaverama, īprīšk saskaņojūt ar Igoru Pliču (29121689).

Fotogalereja: Amanda Anusāne, portals lakuga.lv