Drycānūs atkluos izstuodi par vītejuos katuoļu bazneicys viesturi
![Drycānūs atkluos izstuodi par vītejuos katuoļu bazneicys viesturi](https://www.lakuga.lv/wp-content/uploads/2024/07/drycanu-bazneica-1000x667-c-default.jpg)
Rokstu sagataveja: portals lakuga.lv
Catūrtdiņ, 1. augustā, 18.00 stuņdēs Drycānu draudzis sātā, Rēzeknis nūvodā, tiks atkluota izstuode “Viņi kalpoja Dricānos”, informej bīdreibys “Maziča” puorstuovi. Tei byus kai pastuoveiguo ekspoziceja, kas viesteis par Drycānu svātūs apostolu Simeona i Judys Romys katuoļu draudzis bazneicys viesturis leiklūčim, izceļūt tī kolpuojušūs prīsterus i jūs īguļdejumu.
Katuoļticeiba bejuse i vys vēļ ir byutyska Latgolys kulturtelpys daļa. Deļtuo drycānīšim ruodejīs pošsaprūtami, ka pravesta Māra Laurecka vadeibā atjaunuotuo i 2022. godā īsvieteituo draudzis sāta ir vīta, kur iz prīšku interesentim stuosteit par katuoļu bazneicys viesturi Drycānūs.
Bīdreiba “Maziča”, kas draudzis sātā reikoj izstuodis jau catūrtū godu, itamā reizē cīši sasadorbuoja ar viesturneicu, Drycānu vydsškolys školuotuoju i Nikodema Rancāna bolvys laureati Silviju Laizāni, kurai ir boguoteigys zynuošonys par dzymtuo pogosta viesturi. Līkūt lītā da šam izpieteitū, ir radeita vizuala laika lineja, kas ekspozicejis apmaklātuojim ļaus izsekuot Drycānu bazneicys veiduošonuos viesturei i 20 pietneicai zynomūs prīsteru darbeibai nu 19. godu symta da myusu dīnu.
Faktologiskū informaceju izstuodē “atdzeivynuos” video stuosti, kurūs apmaklātuojus nu TV ekrana uzrunuos poša S. Laizāne. Juos stuostejums atkluos i prīsteru īguļdejumu draudzis i cīma atteisteibā, i izaicynuojumus, kolpojūt bazneicā vysaidu laiku, varu i socialpolitiskūs apstuokļu kontekstā. Viesturneica atguodynuos, ka prīsteri vysūs laikūs ir bejuši ciļvieciskys byutnis ar sovom interesem i rakstura īzeimem i vīna voi cyta īmesļa deļ palykuši bazneicā guojieju atmiņuos. Sovutīs Drycānu boltuos bazneicys ceļšonys stuosts cīši saisteits ar baronu Manteifeļu dzymtu.
![](https://www.lakuga.lv/wp-content/uploads/2024/07/Silvija-Laizane-Dricanu-draudzes-maja_2023--620x457.jpg)
Ekspoziceju papyldynuos atseviški Drycānu bazneicys liturgiskuo apgierba paraugi, nu kurūs senejuokais datejams ar 18. godu symta beigom. Tūs pārņ Latgolys ekspedicejis laikā izpieteja i par tūs izgataveišonu pīzeimis pīraksteja Latvejis Etnografiskuo breivdobys muzeja Etnografejis departamenta vadeituoja, Dr. hist Aija Jansone. Izstuodis apmaklātuojim byus vareiba apsavērt tyvplanā prīsteru tārpus, kas, eipaši jau nazkod, ir pīsaistejuši vītejūs bazneicānu ocu skotus ar izteiksmeigim simboliskajim ornamentim, myrdzumu, kruosom i graznim audumim.
Izstuodis atkluošona nūtiks 1. augustā 18.00 stuņdēs. Draudzis sāta (sūpluok bazneicai) byus attaiseita nu 2. da 4. augusta nu 10.00 da 18.00 stuņžu. Sovutīs nu 5. augusta izstuodi varēs apsavērt, pīsokūt vizeiti īprīšk (tel. nr. 26399590). Īīšona par zīduojumim.
Ekspoziceja “Viņi kalpoja Dricānos” sataiseita ar Rēzeknis nūvoda pošvaļdeibys snāgtū atbolstu Rodūšūs dorbu finansiešonys konkursā, kai ari drycānīšu i cytu labdaru zīduojumim i breivpruoteigu dorbu. Tai kai draudzis sāta palykuse par izstuožu nūtikšonys vītu Drycānūs, ar Eiropys Savīneibys Lauksaimisteibys fonda lauku atteisteibai finansialu atbolstu nu ituo gods telpys apreikuotys ar atbylstūšom mebelem i īkuortom.
![](https://www.lakuga.lv/wp-content/uploads/2024/07/Afisa-Vini-kalpoja-Dricanos-495x700.jpg)
![](https://www.lakuga.lv/wp-content/uploads/2023/11/Lakuga_VKKF-projekts_atbolsts_logo_-620x155.jpg)