Folklorys kūpys “Upīte” juļa dzīsme – “Tys viel nav nikas”
![Folklorys kūpys “Upīte” juļa dzīsme – “Tys viel nav nikas”](https://www.lakuga.lv/wp-content/uploads/2024/07/upite-juls-1000x667-c-default.jpg)
Rokstu sagataveja: portals lakuga.lv
Folklorys kūpa “Upīte” julī klauseituojim duovoj ļusteigu dzīsmi “Tys viel nav nikas”, kū teikuse Anna Slišāne. Tuolajā 1970. godā, kod nūvodpietnīks Ontons Slišāns aizsuoce vuokt, pīraksteit i īraksteit Upītis kulturtelpys folklorys boguoteibu, jis beja pīfiksējs itū jautrū dzīsmeiti. Itūgod, struodojūt pi vierīneiguo projekta – kolhozu laikūs dzīduotūs dzīšmu atjaunuošonys, izpietejūt ari O. Slišāna arhivu, tymā tyka uzītys vairuokys ziņgis. Vīna nu tūs niu ceļoj pi folklorys kūpys “Upīte” klauseituoju i skateituoju.
Bolvu nūvoda Nematerialuos kulturys montuojuma centra “Upīte” direktors Andris Slišāns soka: “Nu 27. juļa leidz pat 3. augustam Zīmeļlatgolā nūtiks jau IV Storptautyskais folklorys festivals “Lipa kust”, kurymā pīsadaleis gosti nu Kostarikys, Čehejis i Gruzejis, partū lela prīca, ka folklorys kūpa “Upīte” ir izalasejuse pyrma festivala izduovuot jautru dzīsmi, kurā var pasasmīt pošim par sevi, tai īskandynojūt festivalu, paruodūt, ka nav kū bāduot, ka vosora jau īsūļuojuse ūtrajā pusē. Tys vēļ nav nikas, nui, dreiži suoksīs rudiņs, tok tys vēļ nav nikas, izbaudom!”
Folklorys kūpa “Upīte” atjaunuotuos dzīsmis publicej, suocūt nu 2023. gods novembra. 21. novembrī tyka prezentāta pyrmuo dzīsme “Kara laukā”. 21. decembrī tika dāvināta klausītājiem jauna dziesma “Kod īt iz balli”. 21. janvarī tyka prezentāta dzīsme “Brigaders”. Februarī tyka duovuota Līvijis Supis teiktuo ukraiņu tautys dzīsme “Marička”. Martā – dzīsme disko skaņuos “Ak, dzeive”, sovutīs aprelī tyka duovuota dzīsme “Žīguļi”. Majā tyka prezentāta Natālijis Smuškys teiktuo dzīsme “Lūgšana”. Juņa dzīsme beja “Rullāti”, bet juļa – “Tys viel nav nikas”. Folklorys kūpa soka paļdis par atbolstu Vaļsts kulturkapitala fondam.
Dzīsmis “Tys viel nav nikas” īroksts tyka veikts studejā “Bigmaar’s Records”, bet video verseju dzīsmei taiseja “Waltz Visuals” kūpā ar video režisorim Andri Slišānu i Kati Slišāni. Video pīsadola folklorys kūpys “Upīte” dalinīki.
Folklorys kūpa “Upīte” dybynuota 2002. godā, atteistūt Upītis bārnu folklorys kūpys, kas dybynuota 1980. godā, darbeibu. Da ituo FK “Upīte” ir izdavuse jau četrus albumus: “Vusi ļauds breinovuos”, “Dzīduot muoku, doncuot muoku”, “Ryugts” i “Padzīdam i…”. Kūpa aktivi pīsadola vysaidūs Latvejis festivalūs i nu 2016. goda Latveju puorstuov ari vysaidūs storptautyskajūs festivalūs vysā Eiropā – Leitovā, Igaunejā, Pūlejā, Itālejā, Čehejā, Rumanejā, Portugalē, Slovakejā, Fraņcejā, Kosovā, Boltkrīvejā.
![](https://www.lakuga.lv/wp-content/uploads/2023/11/Lakuga_VKKF-projekts_atbolsts_logo_-620x155.jpg)