Fotokonkursā aicynoj īmyužynuot latvīšu viesturyskūs zemu rūbežu i vītvuordu nūruodis latgaliski i lībiski
![Fotokonkursā aicynoj īmyužynuot latvīšu viesturyskūs zemu rūbežu i vītvuordu nūruodis latgaliski i lībiski](https://www.lakuga.lv/wp-content/uploads/2024/07/PiZeimis_lakugai-1000x667-c-default.jpg)
Rokstu sagataveja: portals lakuga.lv
Latgalīšu kulturys kusteiba “Volūda”, Latvejis Nacionalais kulturys centrs i Latvejis Universitatis (LU) Lībīšu instituts izsludynoj fotokonkursu “PieZīmes/PīZeimis/JūrõTǟtõkst”, kurā interesenti, apceļojūt Latveju, aicynojūt īmyužynuot jaunuos latvīšu viesturyskūs zemu rūbežu i latgalīšu rokstu i lībīšu volūdā izlyktuos vītvuordu zeimis, viestej konkursa reikuotuoju atsyuteituo informaceja. Fotokonkursā, kurs byus da 30. septembra, var īsyuteit muokslys foto, pašeišus, fotokolažys, taipat atzineibu dabuos ari daleibnīki, kas varēs īmyužynuot vysuvaira nūruožu.
Fotokonkursa nūsaukumā “PīZeimis/PieZīmes/JūrõTǟtõkst” simboliski sasavyn vuordi “piezīmes” i “pie zīmes” (latgaliski “pīzeimis” i “pī zeimis” (pī – Zīmeļlatgolys izlūksnēs), lībiski – “pīzeimis”), aicynojūt konkursa daleibnīkus fotografētīs pošim i rodūši izapaust, īmyužynojūt latvīšu viesturyskūs zemu rūbežu i vītvuordu nūruodis. Konkursa mierkis ir popularizēt latvīšu viesturyskuos zemis i seviški latgalīšu rokstu volūdā i lībīšu volūdā pastateitūs apdzeivuotūs vītu nūsaukumus, kai ari izgleituot sabīdreibu par lībīšu kai Latvejis pamatīdzeivuotuoju volūdu i latvīšu volūdys byušonu vysaidai car latgalīšu rokstu volūdu.
Latvīšu viesturyskūs zemu rūbežu i apdzeivuotūs vītu nūruodis lībīšu i latgalīšu rokstu volūdā atbiļstūši Latvīšu viesturyskūs zemu lykumā nūsaceitajam gar vaļsts autocelim suoce pastateit pārnejuo gods rudinī. Pastateituos zeimis sabīdreibā sajāmušys kai prīcu i atbolstu, tai naizpratni i nūraidūšu atsatīkšonu par zeimu vītu i jamuos paruodeitajom volūdom. Aiz tuo fotokonkursa reikuotuoji tur nūceju, ka itaids aicynuojums dagrīzs sabīdreibys viereibu zeimem i reizē rūsynuos izzynuot Latvejis namaterialū kulturys montuojumu, vītejūs dzeivuotuoju volūdu i Latvejis identitatis elementus. Kai daudzi jau īvāruojuši, niu ir vaļsts leluokūs ceļu ir pastateitys vaira nakai 50 viesturyskūs zemu rūbežu nūruodis (Latgale, Zemgale, Kurzeme, Vidzeme, Sēlija), kai ari vaira nakai 300 vītvuordu nūruodis latgalīšu rokstu volūdā Latgolā i vaira nakai 30 – Lībīšu krostā lībīšu volūdā. Septembra golā gaidoma ari nūruožu pastateišona Vydzemis lībīšu volūdā.
“Nūruodis, kuruos sūpluok latvīšu literarajai volūdai radzama ari lībīšu i latgalīšu volūda, nav tik cīna izruodeišona Latvejis daudzpuseigajam volūdys i kulturys montuojumam – juos ir sarunys suokums par Latvejis volūdys i kulturys boguoteibu šudiņ i reitu, par vysu tū interesantū i aizraunūšū, kū Latvejis nūvodu sovpateiguo volūdys i kulturys telpa var pīduovuot kai pošu lapnumam par sovom saknem, tai gostu cīna pylnys atsatīkšonys i interesis veiduošonā,” soka LU Lībīšu instituta direktors Valts Ernštreits.
Sovpus Latvejis Nacionaluo kulturys centra Viesturyskūs zemu i namaterialuo kulturys montuojuma nūdalis vadeituoja Jana Vērdiņa nūruoda: “Aizsuoktuo nūruožu pastateišona lībīšu i latgalīšu rokstu volūduos ir svareiga, padorūt radzamu Latvejis byušonu vysaidai, aicynojūt dagrīzt viereibu konkretūs vītu viesturei, tagadnei i byušonai iz prīšku. Latvejis Nacionalais kulturys centrs aicynoj īsasaisteit konkursā, lai kūpeigi izcaltu volūdu vierteibys.”
Fotokonkursā aicynuots pīsadaleit kotrys bez vacuma i geografiskūs rūbežu, padorūt vīnu (voi vairuokus) nu konkursa aizdavumu:
- rodūša biļde ar nūruodi voi pašeits/portrets/grupys foto pi kaidys nu latvīšu viesturyskūs zemu rūbežu zeimu, vītvuordu nūruožu latgalīšu rokstu volūdā voi lībīšu volūdā;
- pašeišu/portretu/grupys fotografeju kolaža – kū vaira īmyužynuotūs nūruožu, tū lobuok;
- fotomontaža, izmontojūt sevkurā tehnikā i veidā radeitus elementus, kurā vydā kaida latvīšu viesturyskūs zemu rūbežu zeime, vītvuordu nūruode latgalīšu rokstu volūdā voi lībīšu volūdā.
Fotodorbi kaidā (voi vairuokuos) konkursa kategorejuos juoīsyuta da 2024. gods 30. septembra ar nūruodi “PīZeimis” (“PieZīmes” voi “JūrõTǟtõkst”), rokstūt vasals@voluda.lv (nūruodūt, kurā nu fotokonkursa kategoreju daleibnīks grib pīsadaleit, dorbam juodalīk 1–2 teikumu pīzeime par nūduodis (nūruožu) izalaseišonu, foto tapšonu, autoru) voi īsyutūt tīšsaistis anketā ite: https://ej.uz/PiZeimis. Vīns daleibnīks var īsnēgt naīrūbežuotu konkursa dorbu skaitu (jpg, png voi pdf formatā). Fotografejis/kolažys ar latvīšu viesturyskūs zemu rūbežu zeimu voi vītvuordu nūruodem latgalīšu rokstu volūdā voi lībīšu volūdā var drūsai publicēt ari sovūs socialajūs teiklūs, dalīkūt seikšaļteņu atzeimis #piezimes #pizeimis #jurotatokst. Taisūt biļdis, konkursa reikuotuoji aicynoj saudzeigi izaturēt pret nūruodem, byut viereigim, īvārojūt ceļu satiksmis nūsacejumus, kai ari naradeit draudus sovai i cytu satiksmis daleibnīku drūšeibai.
![](https://www.lakuga.lv/wp-content/uploads/2024/07/PiZeimis_afisa-495x700.jpg)
Konkursa uzvarātuoji tiks nūskaidruoti žurejis viertejumā i publikys simpateju bolsuojumā (socialajā teiklā Facebook nu 7. da 13. oktobra latgalīšu kulturys ziņu portala lakuga.lv kontā facebook.com/lakuga.lv), bet golvonūs bolvu sajiemieji byus zynomi 15. oktobrī, kod teik sveiteita Vaļsts volūdys dīna. Kotrys uzvarātuojs sajims konkursa reikuotuoju saryupātys duovonys – viesturyskajuos zemēs radeitu gordumus, izdavumus i cytus lobumus.
Īmyužynuot latvīšu viesturyskūs zemu rūbežu i vītvuordu nūruodis latgaliski i lībiski aicynoj fotokonkursa reikuotuoji latgalīšu kulturys kusteiba “Volūda”, Latvejis Nacionalais kulturys centrs, LU Lībīšu instituts, kai ari atbaļsteituoji Latgolys turisma asociaceja i latgalīšu kulturys ziņu portals lakuga.lv. Aktivitati finansiali atbolsta Sabīdreibys integracejis fonds nu Latvejis vaļsts budžeta daškiertūs Kulturys ministrejis leidzekļu projektā “Latgaliskuos kulturvidis styprynuošona: sadarbeiba, izpratne i īsaiste”.
![](https://www.lakuga.lv/wp-content/uploads/2023/11/Lakuga_VKKF-projekts_atbolsts_logo_-620x155.jpg)