Rokstu sagataveja: portals lakuga.lv

26. julī teik svieteita Annys dīna, kas zynoma ari kai saimineicu dīna. Latgolā īrostai vairuokuos vītuos tys ir īmeslis lelim svātkim. Tradicionali tys saisteits ar Romys katuoļu bazneicys atlaidom, kū jau nazkod papyldynuoja ari tiergs. Itūgod Annys dīna ir pīktdīnē, kas ļaun tū svieteit vysu nedeļgolu.

Tiergs, cepļa izjimšona, koncerti i ballis

Kai kotru godu, ari itūreiz Annys Dagdā ir vīni nu leluokūs i gaideituokūs svātku. Pīktdiņ, 26. julī, tī aizasuoks ar tierdzeņu piļsātys skverā, kai ari cepļa izjimšonu Ondrupinis pogosta Runčukūs, kur Annom teik sūleitys pat eipašys duovanenis. 27. julī muižys parka estradē byus bārnu i jaunīšu deju kolektivu i grupu “Marysana band” i “Citi zēni” koncerti, kai ari zaļumballe ar grupu “Dabasu durovys”. Sovutīs 28. julī gaidoma putu balleite.

Putrys meistarklase

26. julī Baļtinovys Ontana i Annes parkā nūtiks mīžu putrys ar ciercinim meistarklase, kū vadeis saimineica Marianna Langovska, kai ari muzicēs folklorys kūpa “Rekavas dzintars” nu Škilbānim.

Annys i Jākuba dīnys ļustis

Atašīnē īrostai reizē teik svieteita Annys i Jākuba dīna. 26. julī svātki aizasuoks ar Sv. Misi Atašīnis bazneicā, bet turpynuosīs ar tautys muzykantu i folklorys kūpu saītu “Atašīnis suseklis”. Sastdiņ, 27. julī, jau reita pusē varēs laistīs iz tierdzeņu. Dīnys garumā byus rūtaļprograma bārnim, putu balleite, koncerts “Rodi”, bruolānu Jarānu koncertprograma, Dekteru amaterteatra izruode, kai ari zaļumballe ar pyutieju orkestri “Dekšāres” i Aldi Grandānu.

Prīškautu izstuode, gordumu degustaceja i balle

Annys dīnu 27. julī svieteis ari Sutrūs. Bibliotekā varēs apsavērt prīškautu izstuodi, pi kulturys noma degustēt medinīku vuoreitū zupu, saimineicu captūs peirāgus, pīsadaleit rodūšuos darbneicuos i klauseitīs Jura Ostrovska koncertu. Nūslāgumā – zaļumballe ar “Marchello”.

Vidis objekta atkluošona i koncerts

Cīši stypra Annys dīnys svieteišonys tradiceja ir Rēzeknis nūvoda Bieržgalī. Ari itūgod, svātdiņ, 28. julī, tī reits suoksīs ar tiergu i Sv. Misi. Piec tuos nūzeimeiga nūtikšona – vidis objekta “Dzymtys saknis Bieržgalī” atkluošona i svātku koncerts. Paraleli vysaiduos aktivitatēs varēs īsasaisteit kai bārni, tai pīaugušī.