Augusta beiguos aicynoj iz kasgadejim Kroma kolna svātkim
![Augusta beiguos aicynoj iz kasgadejim Kroma kolna svātkim](https://www.lakuga.lv/wp-content/uploads/2022/08/Kroma_kolns-2-1000x667-c-default.jpg)
Rokstu sagataveja: portals lakuga.lv
Kroma kolna svātki ir kasgadeja prīškpādejuos augusta nedelis nūtikšona, kod kūpā saīt bīdreibys “Kroma kolna bruoliste” dalinīki, bīdreibys draugi i tī, kam interesej tradicejis, viesture i viesturyskuos rekonstrukcejis. Svātku laikā gūdynoj aktivuokūs bīdrus, taipoš ar vysaiduokim puorbaudejumim bruolistē teik uzjimti jauni bīdri. Itūgod Kroma kolna svātki tiks svieteiti 24. augustā, suocūt nu 15.00 stuņdem.
Ituo goda svātku nūtikšonu moto ir kroms i guņs dabuošona ar kromu. Byus stuostejumi par vydslaiku tārpim i tūs atškireibom viesturyskūs zemu vydā, senejūs omotu prezentacejis, apstruodojūt dabyskūs materialus, kai metalu, bronzu, kūku, muolu, uodu i tuosi, taipoš ari vydslaiku iedīni i tūs gataveišonys meistarklase. Sovpus par muzykalom nūskaņom ryupēsīs folklorys kūpa “Speiga”. Taipoš gaidoma ari eipaša leļu teatra izruode, kur tiks paruodeita Madalānu piļskolna Muorys i Marejis kūpejais liktiņs ar Leitovys karali Mindaugu.
Aktivuokajim svātku dalinīkim byus vareiba pīsadaleit lūka saušonys saceņseibuos, kur uzvarātuojs duovonā sajims lūku i bultys, vydslaiku ceiņu turnirā veirim (18+), kur uzvarātuojs bolvā sajims bruņukraklu, vydslaiku ceiņu turnirā jaunīšim (nu 12 da 18 godu), kur uzvarātuojs sajims bolvā nazeiti, vydslaiku ceiņu turnirā bārnim (nu 5 da 12 godu vacuma), kur uzvarātuojs sajims mozū vairūga zūbynu.
Byus ari eipašs bārnu styureits ar vydslaiku izklaidem pošim mozuokajim i mozūs arhitektu konkurss ar bolvom.
Pasuokuma nūslāgumā paradzāta dalinīku gūdynuošona i guņs skulpturys aizdegšona.
![](https://www.lakuga.lv/wp-content/uploads/2024/07/Kroma_kolna_svatki_FB_2024-620x349.jpg)
Kroma kolns ir 9.–13. godu symta latgaļu ciļšu fortifikacejis veiduojumu atdarynuojums. Bīdreiba “Kroma kolna bruoliste” ir dybynuota 2012. godā, tuos vadeituojs i viersaits ir Aleksandrs Lubāns. Bruolistē dorbojās ap 30 dažaidu bīdru nu vairuokim Latgolys nūvodim. Bīdreiba jau vairuoku godu garumā apmeklej vysaiduokus pasuokumus Latvejā i Baļtejā, tai popularizejūt latgaļu dzeivis veidu i kulturys vierteibys. Interveju ar bruolistis viersaiti skaiti ITE.
![](https://www.lakuga.lv/wp-content/uploads/2023/11/Lakuga_VKKF-projekts_atbolsts_logo_-620x155.jpg)