Rokstu sagataveja: portals lakuga.lv

Cyblys folklorys kūpa “Ilža” sataisejuse videoklipu latgalīšu tautys dzīsmei “Guli, guli, leidaceņa”. Kai informej kūpys dalinīki, tys ir jūs duovona Ludzai 847. dzimšonys dīnā, kas itūgod tiks svieteita 10. augustā.

“Ludzys nūvoda skaistuokūs ainovu rakstureiguokuo īzeime ir azari. Na veļti nūvodā var saskaiteit vaira par 200 azaru. Gondreiž tikpat daudz azaru, cik kilometru da Reigai. Ari nūzeimeigi kulturviesturiski objekti i vītys Latgolā bīži viņ atsarūn pi azaru,” tai folklorys kūpa “Ilža” raksturoj dzīsmis izvēli.

“Prūtams, Ludzys nūvoda leluokuo boguoteiba ir darbeigī ļauds, kas kasdīnā struodoj par školuotuojim, rūbežsorgim, audzynoj bārnus i šaļtim māroj daudzūs kilometrus da golvyspiļsātai i atpakaļ. Klipā grupys dalinīki pasaruoda i arheologiskajūs tārpūs, kurūs apvalkūt, simboliski vīnojās kūpeigom vierteibom, i ari kasdīnys tārpūs sovuos dorba vītuos. Dzīsmē, sasasaucūt puori laikmatim i cauri paaudzem, jiutama cereiba par piecteceibu i gaišu byušonu iz prīšku. Videoklips ir ari sovpateiga folklorys kūpys “Ilža” dalinīku vizitkarte,” jī skaidroj.

Videoklipu taiseja studeja “Lauska” – režisors Kaspars Bārbals i operators Gatis Indrēvics.