Rokstu sagataveja: portals lakuga.lv

Izdūta i sevkuram interesentam elektroniski daīmama Adama Mickeviča Poznanis Universitatis profesoris Nikolis Nauys gruomota “Seven hundred Latgalian words. A dictionary based on Stefania Ulanowska’s collection of fairytales from 1895. With morphological and lexicological analyses” (“700 latgalīšu vuordu vuordineica, kas taiseita iz Stefanejis Uļanovskys puorsoku (1895) pamata, ar morfologiskim i leksikografiskim komentarim”). 1. augustā Viļānūs gaidoma tuos prezentaceja.

Pūļu etnografis Stefanejis Uļanovskys 19. g. s. beiguos savuoktais folklorys materials Viļānu izlūksnē ir cīši nūzeimeigs folklorys i latvīšu volūdys izpietei. Uļanovskys etnografiskais tāluojums ar nūsaukumu “Pūļu Inflantejis latvīši, i seviški Rēzeknis apriņka Viļānu pogosta” izdūts 1891., 1892. i 1895. gadā. Tymā materials pīraksteits piec tuo laika latgalīšu rokstu principim i tulkuots pūļu volūdā. Eipaši vierteigys latgalīšu volūdys izpietei ir 53 puorsokys, kas publicātys tāluojuma trešajā daļā 1895. godā, kam tuos atspīgeļoj dzeivu kasdīnys volūdu i boguotu leksiku i ari vuordus, kuri vaira nav voi ir reši atrūnami Viļānu pusis latgalīšu vuordu kruojumā.

Profesoris Nikolis Nauys sastateitajā vuordineicā ir 700 škierkļu, kotrs nu tūs ītver škierkļa vuordu pamatformā, myusu dīnu latgalīšu rokstu volūdys ortografejā, tok saglobojūt Viļānu izlūksnis sovpateibys; atbiļsmi myusu dīnu latvīšu literarajā volūdā; tulkuojumu pūļu volūdā, kai dūts Uļanovskys tekstu tulkuojumā, i angļu volūdā, kai ari pīmāru voi vairuokus pīmārus nu teksta. Vuordineica pīduovoj jaunu materialu latvīšu volūdys pieteišonai vysaiduos nūzarēs. Gruomota elektroniski daīmama ITE.

Nikole Naua (Nicole Nau) ir vuocu filologe, kura dzeivoj Pūlejā. Kasdīnā jei ir lingvistikys profesore universitatē i veic pietejumus par latvīšu i latgalīšu volūdys gramatiku. Taipat jei tulkoj latvīšu i latgalīšu literaturu vuocyski. Pārņ Nikole sajēme Ministru kabineta Atzineibys rokstu kai vīna nu kulturys nūzaris izcileibom – par storptautyskai nūvārtātu īguļdejumu Latvejis literaturys tulkuošonā i populariziešonā Vuocejā. Interveju ar Nikoli Nauu var puorskaiteit ITE.

Vuordineicys prezentaceja paradzāta 1. augustā 15.00 stuņdēs Viļānu nūvodpietnīceibys muzejā. Tamā varēs sasatikt ar autori, kai ari klauseitīs folklorys grupys “Bumburneicys” muzykalū sveicīni.