Rokstu sagataveja: portals lakuga.lv

Pi skaiteituoju tics žurnala “A12” augusta/septembra numers i tymā var puorskaiteit intervejis ar bīdreibys “Organic Synergies” puostuovim, lauku sātys “Ausekli” saiminīkim Mafaldu Garsiju i Edgaru Proveju, muokslineicu Gitu Palmu, pianisti i koncertmeistari Ēriku Milleri i cytys sarunys i stuostus.

Žurnala “A12”, kas ir vīneigais žurnals, kas viestej par Latgolys ļaudim i jūs stuostim, redaktore Ināra Groce ituo numera īvodā soka: “Puormainis var suoktīs tik kūpīnys īškīnē, tys nūzeimoj – kūpīnys dūmuošonā i apziņā. I na jau kotru dīnu juoizpylda kaidi leli aizdavumi, šaļtim pīteik byut par atbolsta placu, troku ideju sarunu bīdru voi sirsneiga vuorda saceituoju.”

Žurnala “A12” augusta/septembra numerī skaitit:

    • Par misejis apziņu Latgolā i puormaiņu procesim vītejā kūpīnā. Portugalītis Mafaldys i latgalīša Edgara sovstarpejuo sinergeja, dzeivojūt meža vydā;

    • Kas kūpeigs ir ikonom, viļcīnim i Roberta Mūka muzejam? Gleznuotuoja Gita Palma stuosta par muokslu, kulturu i muzeja dzeivi;

    • Eistais Rēzeknis ībīzynuotais pīns beja zynoms cylvākim daudzuos pasauļa moluos, vys vēļ meils ari riezeknīšu atmiņuos. Puortykys tehnologs-inžiners i viesturnīks Artūrs Ābuoliņš (Āboliņš) atkluoj, kas ir izpieteits par Rēzeknis pīna konservu kombinatu i kaida vierteiba ir senejūs puortykys produktu īpakuojumim;

    • Rūbežu sorgoj na tik žūgi, bet ari cylvāki, kuri dzeivoj pīrūbežā i ar mīlesteibu struodoj laukūs. Rokstā par Ilgu i Juriju Ivanovim skaitit par jūs saimnīkuošonu dabyskūs pļovu īlūkā, paspiejūt i atteisteit amatnīceibu, i vadeit rodūšuos darbneicys i ekskursejis Zylupis apleicīnē;

    • Sasatikšona Viļakā ar privatkolekcejis “Abrenes istabas” veiduotuoju i kolekcionaru Dzintaru Dvinski. Dzintars ir aizrauteigs nūvoda viesturis pietnīks, kurs ar senejom lītom restaurej paguotnē nūtykušuo stuostus.

Jaunuokajā žurnalā “A12” vysu rokstu vydā ari portala lakuga.lv redakcejis komandys taiseitī stuosti – ar muokslineicu Gitu Palmu i Dekteru amaterteatra režisori Ēriku Bozoviču sasarunoj Laura Melne, bet intervejis fotografejis sagatavejuse Amanda Anusāne. Taipat žurnalā puorskaitoma portala redakcejis sagataveituo informaceja par jaunuokajim gruomotu i muzykys īrokstu izdavumim i fragments nu īprīšk lakuga.lv publicātuos intervejis ar Vaļsts prezidentu Edgaru Rinkēviču.

Žurnals “A12” ir vareiba jau vaira nakai 10 godus izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturiskūs ceļuojumūs laikā i telpā, kai ari byut atkluojumu i puordzeivuojumu dalinīkim. Žurnals izīt 6 reizis godā. Kab atbaļsteitu žurnala byušonu ari iz prīšku, aicynojam abonēt. Jaunuokū žurnala numeri var nūpierkt (kai digitalā, tai taustomā veidā) ite: a12.lv.