Rokstu sagataveja: portals lakuga.lv

23. augustā Viļānu muižys svātku laikā ar latgaliskom kaitom, darbneicom, pīredzis stuostim i koncertu nūtiks Viļānu bārnu i jaunīšu centra sadarbeibā ar Viļānu Muzykys i muokslys školu i Rēzeknis nūvoda Viļānu apvīneibu reikuotais latgalīšu kulturys pikniks jaunīšim.

Pasuokuma mierkis ir styprynuot latgaliskuos pīdereibys apziņu, veicynuot i popularizēt latgalīšu volūdys lītuojumu kasdīnā. Kai izsver nūtikšonys reikuotuoji, svareigi, ka pasuokuma eistynuošonā, organiziešonā i vadeišonā īsasaista poši Viļānu jaunīši. Nūtikšonu atbolsta Rēzeknis nūvoda pošvaļdeiba.

Piknika idejis autore i Viļānu jaunuotnis darbineica Linda Gritāne stuosta, ka ideja organizēt taidu nūtikšonu ruoduos vēļ pārnejuo gods golā, kod Rēzeknis nūvoda pošvaļdeibā tyka organizāts pasuokums “Kafija ar politiķiem”. “Vīna nu pasuokuma temu beja ari par latgalīšu volūdys byušonu i lītuošonu. Uzklausūt pošu jaunīšu redzīņus, ari roduos ideja, ka ir vajadzeiba paruodeit i izceļt latgalīšu volūdu,” soka Linda Gritāne. Vaicuota par tū, voi Viļāni ir latgaliska piļsāta, Linda atsoka, ka latgaliskū Viļānūs var atrast, tok tys varbyut nav vysā acimradzams, taišni deļtuo vajag izceļt i paruodeit, kab latgalīšu volūda palyktu pošsaprūtamuoka Viļānu piļsātys daļa.

Nu 15.00 stuņžu byus vareiba pīdzeivuot vysaidys darbneicys i spēlēt kaitys, kas saistātys ar latgalīšu volūdu i Viļānim. Pasuokumā pīsadaleis Viļānu Muzykys i muokslys školys audziekni i školuotuoji, Viļānu Bārnu i jaunīšu centrs, Maltys Bārnu i jaunīšu centrs i latgalīšu kulturys kusteiba “Volūda”.

Muzykys školys telpuos byus vareiba nūsavērt Viļānu Muzykys i muokslys školys bārnu i jaunīšu taiseituos animacejis fiļmenis latgalīšu volūdā. Byus lūka saušonys meistarklase ar Māri Rumaku. Taipat pasuokumā pīsadaleis sātā ražuotuoji ar darbneicu aktivitatem i vareibu nūpierkt pošu ražuotūs gordumus. Jolanta Smane nu saimisteibys “Slāņi” ruodeis, kai sīt kozys sīra, Ingūna Šulberga nu uzjāmuma “Zelta rika” stuosteis par tū, kai nūteik maizis cepšona i īvuiceis pagatavuot maizis kuortuojumu. Apmaklātuojim byus vareiba ari nūpierkt saļdiejumu, kuru ražoj Karīna Adijāne sovā uzjāmumā “Soltais”.

Piečuok, 17.30 stuņdēs, paradzāta saruna i pīredzis stuosti, par tū, kai saglobuot latgalīšu volūdu šudiņ, kū nūzeimoj byut latgalīšam, i deļkuo vyspuor vajadzātu runuot latgaliski. Gostu vydā byus radejis personeiba Daiga Laizāne aba DJ Deila, uzjiemiejs i viesturnīks Māris Rumaks, plānuotuoja latgaliski “Giut breidi” i kaitys “A kas ite?” autore Līga Springa.

Nūslāgumā, 18.00 stuņdēs, paradzāts koncerts “Vyss apleik maņ munā volūdā skaņ”, kur uzastuos Viļānu Muzykys i muokslys školys audziekni i Nautrānu pogosta jaunīšu rokgrupa “Vysu voi nadaudz” (vadeituojs Ingars Gusāns).