Rokstu sagataveja: portals lakuga.lv

“Pannas Teātris” skateituojim itūrudiņ suoks pīduovuot jaunu izruodi “Mazpiļsāta”, kuruos pamatā ir slovonuokuos myusu dīnu Latgolys lugu autoris Danskovītis komedeja “Naudas celi”. Itei Danskovītis luga junī sajēme atzineibu ari Pīteram Jurciņam veļteitajā literatu konkursā. Izruodis “Mazpiļsāta” režisors Juris Rijnieks liks akterim Zanei Daudziņai, Aldim Siliņam, Elīnai Vānei i Jānim Skanim runuot ari latgaliski i īsajust mozpiļsātys dzeivē ar sirsneibu i humoru.

Izruodē Eiropys ceļus izstaiguojuse mārga Eva atsagrīzs sovā dzymtajā pusē, lai suoktu dzeivuot nu jauna. Juos vizeite pi muoseicys sagrīzs kuojom gaisā vysu īrostū dzeivis ritiejumu i suoks nūtikt naparostys lītys – piļsātys policists sasarūseis i suoks pletēt jiuzys, vītejī krišnaiti tierguos apreibynūšus kekseņus, bejušajam deputatam nakts striptizs atgrīzs veiriškū spāku i, prūtams, Eva satiks sovu Odumu, kurū jei atmūdynuos nu vacpuiša letargiskuo mīga.

Izruožu apvīneibys “Pannas Teātris” producente Antra Rijniece stuosta, ka jī sovim skateituojim grib radeit prīcu i vairuot optimismu. “Myusu izruožu skateituoji zyna, ka, apmeklejūt myusu izruodis, byus vareiba uzluodēt energeju i vairuot lobū i sevī, i apleicejūs. Taišni taida sovūs dorbūs ir Latgolys īvārojamuokuo myusu dīnu dramaturge Anita Ločmele aba Danskovīte – pozitiva, ospruoteiga, laikmeteiga,” skaidroj Rijniece. Jau lobu laiku “Pannas Teātra” režisors Juris Rijnieks vāruojs autoris dorbus, ar jū pošu sasazynuojs, runuojīs, cikom kūpā tykuši pi izruodis “Mazpiļsāta” scenareja. Itūvosor teatra puorstuovi braukuši iz Lūznovu sasatikt i pi reizis nūsavērt Danskovītis radeitū i režisātū izruodi “Naudas celi” Baļtinovys amaterteatra “Palādas” izpiļdejumā. Skateituoju prīca i smīkli līcynuojuši par pareizi izvēli – Danskovītis izruodei juobyut “Pannas Teātra” repertuarā!

“Mazpiļsātys” pyrmizruode paradzāta 25. septembrī Bolūžu kulturys nomā. Cikom kas īplānuotys vēļ devenis izruodis Muorupē, Bruocānūs, Līpuojā, Ūgrē, Slampē, Jiurmolā, Ciesīs, Kuldeigā i Ulbrokā. Beletus iz tom var nūpierkt ITE. Antra Rijniece sūlej, ka piečuok izruodi nūteikti varēs redzēt ari cytvīt, tymā skaitā Latgolys pusē.

Lugys autore ir Danskovīte (Anita Ločmele), režisors – Juris Rijnieks, scenografs – Ivars Noviks, kostimu muokslineica – Una Bērziņa, sovutīs muzykalais nūformiejums byus Vinsenta Kūkuoja i Artūra Uškāna puorziņā. Lūmuos: Zane Daudziņa, Aldis Siliņš, Elīna Vāne, Jānis Skanis.