Rokstu sagataveja: portals lakuga.lv

28. septembrī 19.00 stuņdēs Latgolys viestnīceibā “Gors” gaidoms pīminis koncerts “Kā tauriņi gaismā” par gūdu Latgolys rūžeņai – Aijai Rimšai. Koncertā pīsadaleis zynomi muziki i Aijis leidzgaitnīki, kab atguodynuotu i plotuoku auditoreju īpazeistynuotu ar Aijis personeibu i ceļu muzykā.

“Klausitēs, cik breineigys dzīsmis ir sacerējuse tauta. Es tuos dzīžu i dzīduošu jums. Dzīduošu ari tod, kod mane vaira nabyus… Klausitēs, nanūlaidit spuornus i naskumstit! Godu symtim cauri dzīsme, pošu tautys sacarāta i dzīduota, paleidzējuse uzvarēt bāduos i gryuteibuos. Klausitēs, dzīdit, ceinitēs par sevi, sovim tyvajim! Dorit tai, kai es tū dareju – dzīžūt,” tai 2005. gods rudinī, aizīmūt myužeibā, mums nūvielēja Aija.

Aijis Rimšys pīminis koncertā pīsadaleis Atis Auzāns, Santa Kasparsone, Aija Legzdiņa, Dainis Skutelis, Tihovsku saime, Jurs Ostrovskis, Guntra Kuzmina-Jukna i vokaluo studeja “Skonai”, Gita Dukaļska, Ieva Sutugova i daudzi cyti muokslinīki. Beletus var nūpierkt ITE.

Aija Rimša – vīnkuorša meitine ar plotu sirdi i muzikis dvēseli. Dzīsmis jai topa dabiski i vīgli, vuordi poši par sevi sasakuortuoja ailēs. Aija dzymuse 1967. godā, juos tāvs beja tys, kurs meitai īvuiceja spielēt akordeonu, tok pi sova personeiguo muzykys instrumenta Aija tykuse pīcu godu vacumā, viestej koncerta organizatoru sagataveituo informaceja.

Aija sovys karjerys laikā radeja deveņus soloalbumus, tūs vydā septenis Aijis originaldzīšmu programys i diveji latgalīšu tautys dzīšmu apkūpuojumi “Tev un vientulībai” (1995); “Mīlestības tango” (1996), “Vēju varavīksne “(1997); “Tev līdzās” (1999); “Kāzas Latgalē” (2000); “Kaprīzā meitene” (2000); “Večerinka Latgalē” (2002); “Ar manām ugunīm nespēlē” (2002); “Zem citām debesīm” (2003).