Rokstu sagataveja: portals lakuga.lv

Itūnedeļ kulturys īsacejumus sagatavejs viesturnīks Kaspars Strods. Jis īsoka apmeklēt Latgolai veļteituo mienešroksta “Avīzes Nosaukums”, kura tapšonā ari pats pīsadalejs, prezentaceju Reigā, mīru meklēt pi dobys, kai ari izzynuot nūvodpietnīka Nikolaja Nikulina darbeibu Kuorsovys pusē.

Latgola uorpus Latgolys

Ik kai jau asam pīroduši, ka Latgolys vuords uorpus pošys Latgolys izskaņ dīzgon bīži, tok, pa munam, kulturys kontekstā kotrai itaidai nūtikšonai ir byutyska nūzeime, eipaši, ka tys regionu atspīgeļoj caur myusdīneigom (nareši pat provocejūšom) muokslinīcyskom koncepcejom. Par itaidu pasuokumu nūteikti var saukt mienešroksta “Avīzes Nosaukums” kuortejuo tematiskuo numera prezentaceju, kurs itūreiz byus veļteits taišni Latgolai. Prezentaceja nūtiks 29. augustā 18.00 stuņdēs kopejneicā “Ciemos pie kaimiņa” (Mastu īlā 2, Reigā). Tys sūlejās byut naformals pasuokums, kurā varēs īsaklauseit numerī īkļautūs tekstu skaitejumūs, īsasaisteit sarunuos i gols golā kuortejū reizi aplīcynuot Reigai, ka Latgola ir tepat sūpluok. Vuordu sokūt, garlaiceigai nabyus. Juodasoka, ka izdavuma golvonuo redaktore ir Latgolā i Latvejā, kai ari aiz tuos rūbežu zynomuo literate Ligija Purinaša.

Pi dobys

Īspiejams, ka tys nav nikas jauns, tok mīra i seve leidzsvaruošonys nūlyukūs nedeļgolā laiks laistīs mežā. Itūšaļt tam ir eistais laiks, kam sieņu i ūgu Latgolys mežūs natryukst, vīneigais prīšknūsacejums ir atbylstūšs apgierbs, trauks, kur likt meža lobumus i/voi nazs. Tim, kam napateik sieņuot i ūguot, īsoku vīnkuorši pastaiguot, pabaudeit klusumu i dobys harmoneju. Atguodynuošu, ka tū var dareit ari, ka naesi Latgolā. Vuordu sokūt: “Naesi sieņs i aizej iz mežu!”

Dzymtuos pusis vierteibys

Viesturis gruomotys i viesturyskys izstuodis par Latgolys viesturi nimoz napasaruoda tik bīži. Eipaši taidys, kurys veļteitys kaidam aktivam sovys dzymtuos pusis patriotam i viesturis entuziastam. Itūreiz taids pasuokums 31. augustā nūtiks Kuorsovys kulturviesturis centrā “Līču mājas”. Pasuokuma apmaklātuojim tiks prezentāta labi zynomuo nūvodpietnīka i publicista Nikolaja Nikulina (1934–2022) gruomota “Kārsava. Malnava…”, kluotyn vēļ reizē byus ari juo 90 godu jubilejai veļteituos izstuodis atkluošona. Tamā byus apsaveramys gruomotys, autora dzeivis laikā dabuotuos viesturyskuos līceibys. Sprīžūt piec N. Nikulina bibliografejis, tys varātu byut saistūši na tik vītejim viesturs entuziastim, tok sevkuram, kuram interesej Latgolys viesture.