Rokstu sagataveja: portals lakuga.lv

Augšdaugovys nūvoda bīdreiba “Mūsu Līksnai”, pasasokūt Vaļsts kulturkapitala fonda atbolstam, eistynuojuse projektu, ar kura aktivitatem gūdynuos Jozefa Akeleviča i Tomaša Kosovska dzeivis i dorba guojumu i jūs īguļdejumu latgalīšu volūdys atteisteibā, taipoš publiskā dūmneicā sprīss par bitem i latgalīšu volūdys populariziešonu.

Bīdreiba “Mūsu Līksnai” 1. septembrī 16.00 stuņdēs aicynoj kūpeigi atkluot informativū stendu pi Patmaļu kopim par Jozefa Akeleviča i Tomaša Kosovska dzeivis i dorba guojumu i jūs īguļdejumu latgalīšu volūdys atteisteibā. Materialus stendam apkūpuoja kulturviesturneica i Skryndu dzymtys muzeja vacuokuo specialiste Ilze Uozuoliņa (Ozoliņa). Dorbs pi informacejis apkūpuošonys asūt bejs izaicynūšs, kam dati vuokti pa mozam čipierkstneišam, dasaistūt ari uorzemu viesturnīku zynuošonys i jūs redziejumu.

Sovpus 17.00 stuņdēs Leiksnys pogosta kulturys nomā bīdreiba “Mūsu Līksnai” sadarbeibā ar Leiksnys pogosta biblioteku i kulturys nomu sevkuru interesentu aicynoj iz sarunu latgaliski “Par bitem i latgalīšu volūdu”, pastreipojūt Jozefa Akeleviča pyrmuos laiceiguo satura gruomotys latgalīšu volūdā par biškūpeibu “Eisa mōceiba ap audzeišonu bišu” (1832. g.) aktualitati ari myusu dīnuos i Tomaša Kosovska kai izcylys personeibys fenomenu. Dūmneicys formatā pi kopeja skryuzis tiks pruotuots ari par latgalīšu volūdys lūmu pogosta dzeivē i gaidamom aktivitatem latgalīšu volūdys populariziešonā.

Dūmneicā pīsadaleis Latvejis biškūpeibys bīdreibys Daugovpiļs nūdalis vadeituoja Gunta Some, Puortykys i veterynaruo dīnasta Rūbežkontrolis departamenta Daugovpiļs nūdalis vadeituoja vītneica puortykys jūmā Anita Juškus, bitineica Ilze Puzāne, Leiksnys pogosta bibliotekys vadeituoja Elita Poļakova, kulturviesturneica i Skryndu dzymtys muzeja vacuokuo specialiste Ilze Uozuoliņa, bīdreibys “Lobs.lv” leidzdybynuotuoja Egita Terēze Jonāne.

Kai stuosta bīdreibys “Mūsu Līksnai” puorstuove Gunta Mežule, interesanti, ka dūmneicā profesionali bitinīki, puorskaitūt Jozefa Akeleviča gruomotu, pasadaleis sovā pīredzē, stuostūt par kūpeigom i atškireigom biškūpeibys lītom tūreiz i niu.

“Nu 2021. da 2025. gods atzeimejom latvīšu gruomatnīceibys 500 godu jubileju. Gruomota ir breiveiba, kas paplašynoj pasauli. Akelevičs un Kosovskis ir personeibys, kurys drupeit ir napeļneiti damierstys, deļtam mes par jim runuosim, liksim stendu pi kopim, kur jī obeji apglobuoti, runuosim par jūs gruomotom i myusu pošu dorbuošonūs latgalīšu kulturys lauceņā iz prīšku,” tai bīdreibys “Mūsu Līksnai” puorstuove Gunta Mežule.