Rokstu sagataveja: portals lakuga.lv

Sastdiņ, 7. septembrī, Rēzeknis nūvoda Ūzulainis pogosta Pleikšņūs pyrmū reizi nūtiks muzykalys dzejis reitiškys “Gulguošona”. Kai portalu lakuga.lv informej reikuotuoji, nūtikšonā pīsadaleis literati Valentins Lukaševičs, Annele Slišāne, Arvis Viguls i Anita Mileika, bet ar muzyku reitu pīpiļdeis muziki Ingars Gusāns, Vinsents Kūkojs i flautu grupa “Svīres”.

Kai viestej informaceja, pasuokuma ideja rodusēs, dūmojūt, kai Latgolā Dzejis dīnu laikā pīduovuot jaunus literaturai veļteitus pasuokumu formatus. Taipat reizē “Gulguošona” ir raudzeišona dūt vareibu vaira popularizēt pārnejuo gods latgaliskuo dzejis slama “Rogovkys dzejis voga” uzvarātuoju dzeju i muzyku, ļaunūt izskanēt ari jaunim dorbim literaturai da ituo mozuok īrostā vītā. Sasadorbojūt ar Rēzeknis nūvoda Ūzulainis pogostu, kai nūtikšonys vīta izvālāts pi pošys Rēzeknis asūšais Pleikšņu kolns, bet nūsaukuma “Gulguošona” īdviesme atsaroduse Ontona Kūkoja dzejūļa “Pleikšņu kolni” ailēs: “Gulguošona, gulguošona… /Pleikšņu kolnim apakš /Dzyrkstūšs olūts guldž! /Saīt guldžam apleik vysi, kas tveikst sluopēs, /Smeļ pa laseitei!”.

Sastdīnis reitā, 7. septembrī, 11.00 stuņdēs Pleikšņu kolnā byus vareiba dzierdēt dzejneicys Anitys Mileikys dzejūļus nu juos tikū izguojušuo dzejis kruojuma “ziņas par gadalaikiem”, kai ari ituo gods latgaliskuo dzejis slama “Rogovkys dzejis voga” žurejis lūcekļu – Arva Vigula, Annelis Slišānis, kurei ir vīna nu pārnejuo gods latgaliskuo dzejis slama uzvarātuoju, i Valentina Lukaševiča – dorbus, bet reitu ar muzyku pīpiļdeis Ingars Gusāns, flautu grupa “Svīres” i vēļ vīns slama uzvarātuojs – Vinsents Kūkojs. “Gulguošonā” pyrmatskaņuojumu Ingara Gusāna muzykā pīdzeivuos Arva Vigula dzejūļa “Karaļs” latgaliskais puorlykums, kura autors ir Valentins Lukaševičs.

Kai “Gulguošonys” eipašuos gaškys klauseituojus prīcynuos flautu grupa “Svīres”, kuru koncertprogramā ir kai tautysdzīsmis, kurūs vydā ari latgaliski dzīduotys, tai i autorskaņdorbi ar latvīšu dzejnīku vuordim. Par reitišku daļu i reita kopeju pasuokumā pasaryupēs kopeja grauzdāvotova “KUUP”.

Pleikšņu kolns, nu kura viersys var redzēt vysu Rēzekni, atsarūn pi pošys piļsātys – Ūzulainis pogosta Pleikšņu cīmā, kas reizē ir pīpiļsātys vasarneicu i duorzeņu rajons. Sovulaik kolns bejuse meila piļsātys dzeivuotuoju atpyutys vīta, kaidu laiku aizmiersts, bet niu otkon ite teik taiseiti pasuokumi i pasuokumūs sasateik Pleikšņu dzeivuotuoji i gosti. 2024. gods Dzejis dīnuos Pleikšņu kolns byus ari muzykalūs dzejas reitišku “Gulguošona” pyrmuos nūtikšonys vīta. Vaira par Pleikšņu kolnu var puorskaiteit Valentina Lukaševiča stuostā avīzē “Latgales Laiks” ITE.

“Gulguošona” ir vīna nu Vaļsts kulturkapitala fonda atbaļsteituos “Literaruos jaunradis latgaliski veicynuošonys programys” nūtikšonu. Tū organizej latgalīšu kulturys kusteiba “Volūda”, Rēzeknis nūvoda Nautrānu sporta halle-kulturys noms i Ūzulainis pogosts. Īīšona pasuokumā ir bez moksys, apmaklātuoji teik aicynuoti apsaviļkt atbiļstūši laikapstuoklim.