Rokstu sagataveja: portals lakuga.lv

Kai jau īrosts, ari itūgod septembris vysā Latvejā byus boguots ar Dzejis dīnu nūtikšonom. Mieneša pyrmajā pusē intensiva Dzejis dīnu programa byus Reigā. Tamā natryukst ari daudzveideigu latgalisku nūtikšonu – nu Bronislavys Martuževys dailradei veļteita vokora da kvīru dzejis pasuokuma.

Bronislavys Martuževys dzejis vokors

Jau svātdiņ, 1. septembrī, 19.00 stuņdēs teatra klubā “Hamlets” Dzejis dīnu nūtikšonys aizsuoks Bronislavai Martuževai veļteits dzejis vokors. Bronislavys Martuževys fonda “Rakstītāja” vadeituoja, literaturzynuotneica Anna Egliene, zynuotnyskais redaktors Vents Zvaigzne, Bronislavys Martuževys alter ego padūmu okupacejis laikā, dzejneica, teologejis zynuotnis doktore Eva Mārtuža, folkloriste Dace Prūse i pasuokuma vadeituoja, dzejneica Liāna Langa meklēs volūdu i jāgu Bronislavys Martuževys dzejā, dzīsmēs i dzeivē. Skanēs dzīsmis, dzeja i idejis par latvīšu volūdu, paguotni, tagadni i nuokūtni.

Latgolys, Vydzemis i Kūrzemis dzejneicu sasatikšona

3. septembrī 19.00 stuņdēs Jāņa Akuratera muzejā sasatiks treis dzejneicys – kotra nu sova Latvejis kulturviesturyskuo nūvoda. Latgolu puorstuovēs Anna Rancāne, Vydzemi – Daina Sirmā, Kūrzemi – Gunta Šnipke. Juos papyldynuos etnomuzike Biruta Uozuoliņa (Ozoliņa). Pasuokumu vadeis Aivars Eipurs.

Latgalīšu dzejis vokors

8. septembrī 19.00 stuņdēs muokslys centrā “Noass” paradzāts latgalīšu dzejis vokors “Myužeigi cyts/cyta”. Pasuokumu vadeis Ilga Šuplinska, tymā pīsadaleis Anna Rancāne, Valentins Lukaševičs i Ilze Sperga. “Myužeigi cyts/cyta” byus saruna par pošim: kai atrast i napagaisynuot sevi itymā laikā i kas eisti ir muns laiks i telpa. Puordūmys i miniejumi, parkū latgaliskais ir “myužeigi” cyta kategorejā. Ari par rūbežu/-im vaļstei, volūdai, pasauļam, dzejai, cylvākam.

Literaturys vokors “DIVI”

Kotru mienesi dzejneica Inga Pizāne kulturtelpā “Northern Grip” reikoj literaturys vokoru “DIVI”, kurā ar skaitejumim pīsadola diveji literati. Jī ari kotrys atbiļd iz vīnu Ingys sagataveitu vaicuojumu, kai ari apsamaina ar sovim vaicuojumim. Septembrī itymā pasuokumā varēs satikt Latgolys literatus – Anitu Mileiku i Valentinu Lukaševiču.

Kvīru dzejis dīna

13. septembrī 18.00 stuņdēs bārā “Aleponija” byus literatis Ingys Gailis reikuots pasuokums – Kvīru dzejis dīna. Tamā varēs dzierdēt Katrīnys Rudzītis, Elīnys Kokarevičys, Kris Odze Gržibovski, latgalīšu literata mygluoja i ariel rosé dzeju.