Rokstu sagataveja: portals lakuga.lv

Kab gūdynuot Latgolys pyrmuos atmūdys darbinīka, monsinjora Nikodema Rancāna (1870–1933) lelū davumu Latgolys kulturā i izgleiteibā, jau deveitū reizi teik izsludynuota Nikodema Rancāna bolva Latgolys izcyluokajim pedagogim, viestej organizatoru puorstuove Ilga Šuplinska.

Nikodema Rancāna bolvys mierkis ir styprynuot pedagoga profesejis prestižu i atpazeistameibu sabīdreibā, gūdynojūt izcylu veikumu pedagogiskajā darbeibā i veicynojūt latgaliskuos kulturys tradiceju īaudzynuošonu jaunajā paaudzē. Bolva teik padūta reizi godā pyrmsškolys audzynuotuojim, vyspuorejuos i pamatizgleiteibys īstuožu školuotuojim, kai ari augstuokuos i videjuos profesionaluos izgleiteibys vuiceibu vītu pedagogim. Bolvys svareiguokais aspekts ir školuotuoju īguļdejums vuiceibu dorbā, latgaliskuos kulturys i tradiceju kūpšona. Itūgod pretendentu dasacejumi teik pījimti da 18. septembra.

Pīmiņūt monsinjora N. Rancāna daudzveideigū pedagogiskū i sabīdryskū darbeibu, konkursa laureatim bolvu daškir itaiduos nominacejuos:

• par latgaliskuos vidis radeišonu i latgaliskūs vierteibu saglobuošonu i styprynuošonu pyrmsškolys izgleiteibys īstuodēs;
• par īguļdejumu i sasnāgumim latgalīšu volūdys, kulturviesturis i nūvoda vuiceibys īvīsšonā i īdzeivynuošonā školys vuiceibu vidē;
• par sasnāgumim latgalīšu volūdys, literaturys i kulturviesturis īdzeivynuošonā augstuokuos izgleiteibys īstuodis studeju vidē;
• par rodūšu i psihologiski atbolstūšu pīeju vuiceibu procesa organiziešonā (aicynoj pīsaceit izgleiteibys īstuožu vadeituojus).

Pretendenti vysuos nominacejuos aicynuoti paruodeit modernūs tehnologeju pīlītuojumu vuiceibu dorbā. Apsveicama jaunu metožu i pīeju, strategeju, metodiskūs dorbu izstruode, publikacejis, pīredzis populariziešona, dorbs ar vacuokim i c. Vysuos nominacejuos pretendentim tiks pīškierti papyldu punkti pi izviertiešonys, ka vuiceibu process teik organizāts ari latgalīšu volūdā.

Konkursa žurejis sastuovā ir Latgalīšu kulturys bīdreibys vaļde, Latgolys Etnografiskuo viestnīceiba, Latgolys Planavuošonys regiona pošvaļdeibu puorstuovi.

Konkursa uzvarātuoji tiks paziņuoti tradicionalajā Nikodema Rancāna bolvys padūšonys pasuokumā, kas nūtiks kaidā nu Latgolys pošvaļdeibu. 2024. godā pasuokums nūtiks 28. septembrī, plotuoka informaceja par tū sekuos.

Konkursa nūlykums i dasacejuma anketa ir daīmama ITE.