Rokstu sagataveja: Laura Spundere, portals lakuga.lv

Zynoms, ka daudzim Latgola asociejās ar katuoļu bazneicu, šlagermuzyku i sirsneigim ļaudim. Tok, voi myusu dīnu Latgola var asociētīs ari ar repa muzyku? Sarunā ar reperi Bruolānu raudzejom nūskaidruot, cik vīgli Latgolā byut rodūšam, kai tūp dzīšmu teksti i kod tod gaidoms jaunais Bruolāna i bītmeikera Jezupa kūpdorbs – albums “Bagāža”.

Mozuok cylvāku, mozuok rodūšuma

Latgolā underground kultura i ari cytaižuokys, uorpus vaira tradicionalu kulturys, muokslys i muzykys žanru, rodūšys izpausmis, ir mozuok saradzamys, nakai, pīmāram, puornūvodūs. Deļkam tys tai? Bruolāns soka, ka vīns nu īmesļu ir gona trivials – mozuok cylvāku, mozuok rodūšuma. Taipoš jis pīzeist, ka tryukst vītu, kur byutu vareiba atteisteit rodūšuos prasmis, tymā storpā ari muzykys. Vaicoju ari par tū, kaida ir īškejuo sajiuta – cik sabīdreiba ir atvārta jaunim vierzīnim, cytaižuokai muzykai? “Tamā vidī, kur es atsarūnu, tei ir atvārta, tok kūpumā ir nūvāruotys teņdencis, ka cylvāki ir dīzgon konservativi, vysu jaunū napījam ar ploti atvārtom rūkom.”

I niu iz skotivis – Bruolāns

Bruolāna aba Edgara skotivis vuords radīs vīnkuoršai: “Vēļ dzeivojūt Vuorkovā, ar draugu laiku pa laikam skaitejom breivrunys, draugs sevi nūsauce par Snīgaveiru, tod pasaceja: “I tagad uzastuoj Bruolāns.” Kod suoču nūpītnuok nūsadorbuot ar muzyku, atrodu itū senejū īrokstu, i tai ari tys palyka par munu skotivis vuordu. Niu tys jau ir godim īsaguojs, ka mani ari iz īlys kaids tai pasauks, es reagiešu.”

Edgars īt nu Preiļu nūvoda Vuorkovys, tok jau desmit godu dzeivoj Rēzeknē, seņuok tics ite, kab vuiceitūs Rēzeknis tehnikumā. “Muns ceļš muzykā suocēs tod, kod saguoju kūpā ar Jezupu aba Jezupa bītim. Sapazynom drauga dzeivūklī, beja kūpeigys interesis, tai ari aizguoja. Sovpus caur Jezupu īpasazynu ar puorejim “Ausmeņa Records” cylvākim.”

Bruolāna teksti jau nu suokta gola ir radeiti latgaliski. Jis stuosta, ka kai saimē, tai ari ar draugim vysleidz ir runuots latgaliski, deļtam teiri logiski, ka ari dzīšmu teksti ir latgalīšu volūdā. “Cik sevi atguodoju, vysu dzeivi klausiejūs repu. Suoču, kai laikam daudzi, ar 50 Cent i Eminemu, niu klausūs daudzus: Wu-Tang Clan, Gang Starr, Griselda Records, Freddie Gibbs, Denzel Curry, Lloyd Banks i cytus. Latvīšu muzyka puoruok bīži naīīt munā dzīšmu sarokstā, tok cytreiz klausūs ansi i Sudrabu Sirdi. Deļkuo taišni reps? Gryuši nūraksturuot. Laikam kai izdzierdieju, tai par reizi ari aizruove.”

Apvīneiba “MKH41”

Zam apvīneibys “MKH41” nūsaukuma globojās Bruolāns, Nikita Grapp, Jezups, Archa1177, DJ Valns, Mesa, Pluto, tok Bruolāns pastreipoj, ka itys projekts niu nav eisti aktivs. Vaicuots, par tū, kai atsašifrej apvīneibys nūsaukums, jis pasmaidūt soka, ka eipaša stuosta nav. “Kod nūbrauču iz Rēzekni, maņ te vēļ nabeja draugu voi paziņu, tok nu seņuku laiku pazynu Elmāru, kurs sovpus pazyna ari Jezupu, Nikitu Grapp, Aldibi, Valnu, Ūgu i Kvāpu, tai es ari jim īpasazynu. Pi Elmāra nūtyka breivrunu vokori, ar laiku vītai tyka dūts nūsaukums Emkys Hata (MKH). Sovpus 41 ir roksts, kurs beja saradzams iz tuo dzeivūkļa tapetem.”

“Jezups redzēja manī potencialu i pīduovuoja īsaraksteit. Laika gaitā Nikita pīduovuoja īraksteit kūpeigu albumu, izdūmuojom, ka tys juoroksta kai apvīneibai MKH41. Nikita i Jezups ir autori MKH41 albuma bītim,” stuosta Bruolāns.

Kod dūma nūsastuoj, raugu tū puorlikt iz papeira

“Muni dzīšmu teksti ir par tū, kas tamā šaļtī nūmuoc i par kū ir sajiuta, ka varātu parunuot i pastuosteit vaira. Kod dūma nūsastuoj, raugu tū puorlikt iz papeira. Teksti var tapt sevkurā laikā, ir nazkaids “tinkš” i ir.”

Vaicuots par kaidim spylgtim pīredzejumim nu sovu koncertu, jis stuosta, ka vīna nu spylgtuokūs pīredžu ir vīns nu pyrmūs koncertu Reigā. “Pyrma cik godu tys beja, niu jau napīmiņu… Koncerts nūtyka Andrejsolā “Noliktava Nr. 3”, tī beja lels hiphopa pasuokums, iz kuru pasauce Ūgu, tod pīslēdze myus kai “MKH41”, cylvāku beja cīši daudz, deļtam taida nabejuse pīredze.”

“Vēļ cyta interesanta pīredze beja sadarbeiba ar rakstneicu Ligiju Purinašu. Mes bejom Solyspiļs Botaniskajā duorzā, juos gruomotys “Pierobežas” atkluošonys pasuokumā. Tī fonā nabeja muzykys, vajadzēja vysu skaiteit a capella, kur beja sakombināti muni teksti i juos dzeja. Maņ personeigi skaiteit ar muzyku ir pīrostuok, tok ari bez muzykys nabeja sarežgeiti, vīnkuorši sovaižuok. Tai pa itim godim asu uzastuojs daudz kur – Ciesīs, Līpuojā, Daugovpilī, prūtams, tepat Rēzeknē. Nav eisti atškireibys – uzastuoju Latgolys piļsātuos voi uorpus tūs, svareiga ir publika, kaida sasalosa.”

Septembra beiguos gaidoms jauns albums “Bagāža”

Bruolāns stuosta par plānim, ka jaunais albums tiks izdūts septembra beiguos, taipoš byušūt ari albuma prezentaceja nazkur Rēzeknē, tok pagaidom vēļ navarūt atkluot taišni kur. Albums “Bagāža” byus kūpdorbs ar Jezupu. Albums topa ar puortraukumim, i pyrmais gobols beja īraksteits ap 2019. godu.

“Jaunais albums “Bagāža” ir konceptuals, sastuov nu treis daļu, nu muna tymsuokuo punkta iz gaišuokū punktu.

Albums ir par mani, par pīdzeivuotū godu laikā, par sajiutom, par bezatbiļdeigu dzeivis veidu, kod kū na viņ dori, a dūmoj tik piec tam, sovpus gaišuokuo puse – kod jau atīt kaida na viņ apziņa i izpratne par lītom. Albumā byus sadarbeiba ar Danu Vasiļjevu i DJ Valnu, prūtams, vysi bīti Jezupa, gondreiž vysi vokali muni, vīnā dzīsmē byus dzierdama ari Dana. Vysi teksti albumā byus latgaliski. Albumā byus 12 dzīsmis i vīns bonusa track, kurs ir nadaudz uorpus konteksta, tok gribējuos ari tū īlikt.

Pyrma albuma izīšonys publicēsim ari kūpeigū singlu ar Danu Vasiļjevu – “Asu dzeivs”. Ar Danu sapazynom cīši vīnkuorši, mums blokus atsarūn īrokstu studejis, vīnā ir “Ave Pohus”, ūtrā mes ar Jezupu. Tai mes tī vīns ar ūtru komunicejam.”

Edgars stuosta, ka piec albuma prezentacejis, ka byus interese nu cytom pusem, varātu tapt ari kaida koncertu sereja, tok jis ari pīzeist, ka pošam parosti napateik cytim raksteit i pīsaduovuot. Vēļ Edgars stuosta, ka lobpruot grybātu sareikuot kaidu koncertu Preiļūs, ari da šam Preiļūs ir bejušys puors uzastuošonys, tok taidys nanūpītnys.

Golvonais – nakopēt cytus

Vaicuots par gribiešonu sasadorbuot ar cytim muokslinīkim, Bruolāns apdūmojūt soka tai: “Parosti es rokstu par tū, kas doruos munā golvā, deļtam, pa munam, nav garantejis, ka cyts cylvāks varēs īīt tamā situacejā.” Jis stuosta, ka nu suokuma dzīsmis topa ilgā laika periodā, niu cytreiz saīt saraksteit dzīsmi ari pa vīnu vokoru. “Ka ir skaidrys, kū tu gribi pasaceit, dzīsmi var pīraksteit ari pa vīnu vokoru. Kū vaira tū doru, tū vaira saīt.”

Edgars stuosta par repa jiedzīni flovs aba plyusma, kas apzeimej tū, kai repers izaklausa i īsakļaun muzykys ritma plyusmā, te kotram izpiļdeituojam asūt sovys īzeimis. “Koč kaidys cytu izpiļdeituoju īzeimis pasaruoda kotram, vystik saīt, ka kotrys nu kaida īsatekmej, tok golvonais ir nakopēt, lai nav tai, ka skaniejums ir vīns pret vīnu.”