Rokstu sagataveja: Laura Spundere, portals lakuga.lv

Naskaidreibys par finansiejumu deļ īprīškejuo vuiceibu goda suokuos kaidu šaļti vaļdeja naziņa, voi iz prīšku školuos vyspuor byus vareiba vuiceit latgalīšu volūdu. Vystik iz 2023. gods pādejim divejim mienešim izadave tikt pi finansiala atbolsta tam. Niu, suocūtīs jaunajam vuiceibu godam, portals lakuga.lv otkon vaicoj – voi ari itūgod školuos byus vareiba vuiceitīs latgalīšu rokstu volūdu?

Augusta beiguos Izgleiteibys i zynuotnis ministreja (IZM) aicynuoja iz tīšsaistis sasatikšonu ar ministri Andu Čakšu, vīns nu sarunys punktu beja ari par latgalīšu volūdys vuiceibu nūdrūsynuošonu školuos. Pyrma nūīmam pi golvonuo vaicuojuma, te vēļ grybātūs pastreipuot, ka itaida veida sasatikšonys ar regionalajim masu medejim nūtyka pyrmū reizi i teik sūleits, ka leidzeigys nūtikšonys, ar vareibu aizdūt vaicuojumus ministrei, tiks organizātys ari iz prīšku. Vysu tīšsaistis laiku pīsadaleja tik diveji regionalī medeji – portals lakuga.lv i Latgolys Regionaluo televizeja. Tys dīvamžāļ paruoda ari pošu regionalūs medeju leidzatbiļdeibys i īsaistis leimini, tok turim nūceju, ka iz prīšku tys maineisīs i interese nu regionalūs medeju byus plotuoka.

Izmainis pedagogu dorba atolguojumā

Anda Čakša sovā uzrunā pastreipuoja: “Vīns nu lelūs IZM mierku ir ļaut izgleiteibys sistemai just stabilitati, kab nasarostu sajiuta, ka pādejā šaļtī nazkas teik lauzts vai maineits, tai ari vysys niulejuos IZM aktivitatis lelā mārā ir jau īprīšk aizsuoktūs reiceibu turpynuojums, tik atseviškys lītys asūt jaunīvadums, tok ari tuos ir saskaņuotys ar nūzari.” Ministre ari stuosta sovu redziejumu, ka ir cīši svareigi turpynuot runuot partū, ka izgleiteibys sistemys pamatakmiņs ir sevkurs školuotuojs, kurs ari nūdrūsynoj izgleiteibys kvalitati. Cīši svareigi asūt nūstyprynuot školuotuoja kai profesejis prestižu i konkurētspieju. 2023.-2024. vuiceibu godā ir dabuots viesturiski leluokais pedagogu atolguojuma pīaugums, kūpumā nūzarei daškierti 300 miļjoni eiro, cikom taišni pedagogu atolguojumam veļteiti 75 % nu ituos sumys.

Cyts finansiešonys modeļs

Taipoš ministre skaidruoja, ka, suocūt ar itū vuiceibu godu, teik maineits školu finansiešonys modeļs nu niulejuo “nauda sekoj školānam” iz “programa školā”. Ituo modeļa maiņa saisteita ar tū, ka pošvaļdeibuos, kur ir mozuoks dzeivuotuoju skaits, izgleiteibys īstuodem teik radeitys navīnleidzeigys īspiejis nūdrūsynuot kvalitativu izgleiteibu. “Ka pošvaļdeibā ir mozuoks dzeivuotuoju skaits, attīceigi tai teik daškierts ari mozuoks finansiejums. Eipaši, ka runojam par Latgolys regionu, redzim, ka itei sistema ir navīnleidzeiga. Jaunais modeļs paradz – ka školā ir nūsaceits realizēt kaidu programu, tod kai školuotuoju skaitam, tai atbolsta personalam ari juoteik nūdrūsynuotam. Taidā veidā mes ceram dūt leluoku motivaceju struoduot ari pošim školuotuojim,” skaidroj Anda Čakša.

Vēļ papyldu atbolsts nu IZM, kurs potenciali varātu byut nūdereigs ari Latgolys regiona školuotuojim, ir papyldu kompensaceja par transporta i dzeivis vītys īris moksu. Itys instruments paradzāts školuotuojim, kuri struodoj vītā, kas atsarūn tuoļuok nu jūs dzeivis vītys. Leidz ar tū ir nūceja dasaisteit školuotuojus struoduot ari attuoluokuos vītuos.

Garantāts vaļsts atbolsts latgalīšu volūdys vuiceibom

Kai jau roksta īvodā mynāts, 2023. godā garantāts vaļsts atbolsts latgalīšu rokstus volūdys vuiceišonai školuos tyka daškierts viņ div mienešus nu novembra da decembra, tuo apmārs beja viņ 5822 eiro, tūlaik īsasaisteja 23 izgleiteibys īstuodis. Sovpus vysa 2024. gods garumā atbolsta apmārs sasnādz 132 600 eiro i volūdys vuiceišonys nūdrūsynuošonā īsasaistejušys 34 vuiceibu īstuodis.

IZM nūruoda, ka ari cytugod atbolsts latgalīšu rokstu volūdys vuiceišonai tiks nūdrūsynuots. “Svareigi, kab ari vītejuo komūna byutu īinteresāta i izsaceitu gribiešonu vuiceitīs volūdu, partū ka viņ tai mes varim runuot par volūdys saglobuošonu,” nūruodeja izgleiteibys i zynuotnis ministre Anda Čakša.

Kai stuosta ministris padūmneica strategiskuos komunikacejis vaicuojumūs Inga Vasiļjeva, kab školānim byutu vareiba vuiceitīs latgalīšu volūdu, vysupyrma teik sagaideits, ka školuotuojs sovys školys direktoram izsaceis gribiešonu vuiceit volūdu, tūlaik školys vadeiba dasoka tū pošvaļdeibys izgleiteibys puorvaļdei. Niu IZM ir nūslāgti sadarbeibys leigumi ar vysom deveņom regiona pošvaļdeibom. Ministre Anda Čakša vys ari nūruoda, ka itūšaļt ilgtermiņa plāna par atbolstu latgalīšu volūdys vuiceibom nav, tai ka tys ir teiši atkareigs nu pošu školu interesis. Jei nūruoda iz teņdenci, ka školu, kurys gotovys īsasaisteit latgalīšu volūdys apvuiceibu nūdrūsynuošonā, palīk mozuok, leidz ar tū ir ari cīši svareigi struoduot pi tuo, kab školu skaits, kas izalosa vuiceit latgalīšu volūdu, napalyktu mozuoks.

Veidi, kai vuiceitīs volūdu

Portals lakuga.lv sovim sekuotuojim socialajūs medejūs vaicuoja, voi, pa jim, školuos byutu juovuica latgalīšu volūda. Vairums, t.i., 89 % atbiļdēja apstyprynūši, ka volūdys vuiceibom vajadzātu byut. Taipoš sovim skaiteituojim vaicuojom, kaidūs veidūs jī grybātu vuiceitīs volūdu, te vairums atbiļdēja, ka dūtu prīškrūku drukuotim voi digitalim materialim i vuiceibu īrokstim, taipoš ari tīšsaistis vuiceibu cyklim, sovpus mozuokuo daļa pīzyna, ka bīžuok byutu juoveidoj eisi volūdys testi zynuošonu atsvaidzynuošonai.

Leivuona nūvoda Jaunsylovys pamatškolā jau ūtrū godu piec kuortys byus latgalīšu volūdys puļceņš, kuru voda Evita Doļge-Vārpsaliete. Jei stuosta, ka pyrmajā godā guoja labi, nūdarbeibys apmeklēja tī školāni, kuri reali beja īinteresāti. Evita raudzeja dorbuotīs ar školānim nu 5.–8. klasei, izmontojūt vysaidys metodis, ari runuot par latgalīšu volūdys alfabeta atškireibom, raudzeit atguoduot meiklis. Jei ari pastreipoj, ka gona nūzemeiga ir viesture i stuosts par Jersiku kai īvāruojamu vītu. “Ar školānim kūpā vēremēs ari Daugovpiļs teatra akteru īrunuotūs video, kur latgaliski tyka stuosteits par vīnkuoršim sadzeivis prīškmatim, pīmāram, golda pīdarumim, tū, kas nūteik duorzā i tamleidzeigai. Saprotom, ka mes pazeistam na vysus vuordus, partū ka izlūksnis Latgolā atsaškir,” stuosta Evita.

Izgleiteibys īstuodis, kuruos var vuiceitīs latgalīšu rokstu volūdu formalajā izgleiteibā 2023./2024. vuiceibu godā:

• Fakultativajuos nūdarbeibuos – Rēzeknis nūvoda Kaunatys vydsškolys 4. i 5. klasē, Rēzeknis 5. pamatškolys 5. i 6. klasē.
• Specializātajā kursā vydsškolā – Augšdaugovys nūvoda Salīnys vydsškolā, Daugovpiļs Draudzeiguo aicynuojuma vydsškolā, Rēzeknis nūvoda Nautrānu vydsškolā i Rēzeknis nūvoda Viļānu vydsškolā.

Izgleiteibys īstuodis, kuruos var vuiceitīs latgalīšu rokstu volūdu interešu izgleiteibā 2023./2024. vuiceibu godā:

• Rēzeknis nūvoda Nautrānu vydsškolā;
• Bolvu nūvoda Viļakys vydsškolā;
• Ludzys nūvoda Mērdzinis pamatškolā;
• Ludzys Muzykys pamatškolā;
• Ludzys nūvoda Cyblys pamatškolā;
• Ludzys nūvoda Zylupis vydsškolā;
• Ludzys nūvoda Kuorsovys vydsškolā;
• Ludzys piļsātys vydsškolā;
• Preiļu nūvoda Bārnu i jaunīšu centrā;
• Rēzeknis nūvoda Viļānu vydsškolā.