Rokstu sagataveja: portals lakuga.lv

Bīdreiba “Rogovkīši” ar Vaļsts kulturkapitala fonda atbolstu realizējuši projektu “Andryva Jūrdža namaterialuo montuojuma saglobuošona i populariziešona”, informej tuo vadeituoja Terēze Kūkuoja. Projekta laikā digitalizāti diveji biblioteku kruojumūs sasaglobuojuši Andryva Jūrdža rūkrokstu originali, dūmūt vareibu tūs īpazeit plotuokai auditorejai. 

19. godu symta ūtrajā pusē Latgola atsaroda Vitebskys gubernis sastuovā i nu 1865. da 1904. goda Latgolā tyka aizlīgta gruomotu īspīsšona latīņu burtim i tūs izplateišona. Drukys aizlīguma laikā Latgolu raudzeja puorkrīvuot, vītejim dzeivuotuojim izdūdūt i izplotūt gruomotys tik kirilicā, aizlīdzūt latgalīšu volūdys lītuošonu školuos, tymā skaitā ari školānu saziņā sovā vydā, i īvīšūt krīvu volūdys lītuošonu pat katuoļu bazneicā.

Vītejī Latgolys dzeivuotuoji, katuoļu goreidznīceibys īdvasmuoti, puorkrīvuošonai napasadeve i turpynuoja lītuot agruok izdūtuos gruomotys ar latīņu burtim. Itom gruomotom nūsalītojūt, daudzi suoce tuos poši ar rūku puorraksteit, bīži papyldynojūt ari ar sovim tekstim. Jūs vydā vysvaira zynomais ir Nautrānu aba Zaļmuižys pogosta zemnīks Andryvs Jūrdžs (1845–1925), kuram da myusu dīnu ir sasaglobuojs daudzveideiguokais, originalim tekstim boguotuokais rūkrokstu kruojums, koč i nūzeimeiga tuo daļa laika gaitā ir guojuse būjā.

Latvejis Nacionalajā bibliotekā globojās slovonuokais juo dorbs – 1916. godā saraksteitais “Myužeygays kalinders ar sayminiceybas iwirojumim por wyssu godu”. Da ituo pylnā apjūmā izdūta ituo kalendera transkrybātuo verseja (1999) ar volūdneicys Annys Stafeckys komentarim, kas ir nūzeimeigs īguļdejums manuskripta izpietē, tok tys nasnādz piļneigu prīškstotu par rūkrokstu literaturu, kam izdūts ar drukuotim burtim i tik dažom malnboltom originala karteņom.

Latvejis Universitatis Akademiskajā bibliotekā globojās vīns nu mozuok zynomajim, leidz ar tū ari vysmozuok pieteitajim Andryva Jūrdža rūkrokstim – laiceigu saceriejumu kruojums, kurā vydā ir puorsokys, dzīsmis, lyugšonys i tml.

Piec digitalizacejis ar obejim itim rūkrokstim var īpasazeit Rēzeknis nūvoda sātys lopā.