Rokstu sagataveja: portals lakuga.lv

Pamozam sagaidūt rudini i baudūt syltūs saulis spaitus, ailineica i dobys fotografe Rasma Svikle aicynoj izstaiguot Leivuona piļsātu i tuos apleicīni, īsavērt Leivuona stykla i amatnīceibys centra izstuodēs i pagasteit vacuokajā muzykys i aiļu festivalā Bolvu nūvoda Upītē. Cyta vydā da septembra gola Leivuona nūvoda Rūžupis bibliotekā apsaverama pošys Rasmys dobys fotografeju izstuode “Dabas mirkļu mozaīka”.

Izkruot D vitamina rezervis

Cikom septembris veļ deveigs i doluos ar vasareigu syltumu, vajag izkruot D vitamina rezervis zīmai. Tū var izdareit, dūdūtīs iz Leivuonu i izīmūt riņči pa pussolu. Pastaigu var suokt gar Dubnys krostu pretim Leivuona inžinertehnologeju i inovaceju centram i īt upis plyuduma vierzīnī. Tai, giunūt sauli, vārojūt putynus i makšarnīkus, var nūīt da Dubnys ītakai Daugovā, izbaudeit breinegu skotu, apdūmuot dzeivi i turpynuot ceļu jau gar Daugovys krostu. Bet, ka kuods grib nūīt garuoku gobolu voi pabraukt ar ritini, var apmeklēt Greivys aktivuos atpyutys parku. Tī vysod ir kū dareit, i vīta ir draudzeiga ari saimem, pastaigu styga gona loba kai lelom, tai mozom kuojeņom.

Apsavērt “Pierļu cymdus”

Koč i uorā gona vasareigi i skaisti, laiks jau dūmuot par rudini. Kab nūsaskaņuotu cymdu i capuru laikam, aicynoju dūtīs iz Leivuona stykla i amatnīceibys centru, kur da 31. oktobra var apsavērt Mārītis Kokinys Lilo izstuodi “Pērļu cimdi”. Izstuodē apmaklātuojus prīcynuos kruosaini i cīši šmuki ar vysaidim pierļu rokstim darynuoti pierkstaini. Itei izstuode nūteikti varātu īdvasmuot sevkuru, tok eipaši jau rūkdarbneicys, kab taptu kas jauns zīmys sezonai. Kod cimdi apsavārti, var īgrimt Leivuona stykla pasaulī i apsavērt pastuoveigū centra ekspoziceju.

Pabyut vacuokajā muzykys i aiļu festivalā Upītē

Kod Leivuons izstaiguots, juobrauc krītni tuoļuok, iz Upīti, aiz tuo, ka tī 21. septembrī 18.00 stuņdēs nūtiks senejuokais i īspaideiguokais meilys aiļu i muzykys festivals “Upītes uobeļduorzs”. Pasuokuma programa eistyn īspaideiga, itūgod tī varēs dzierdēt taidus muokslinīkus kai Vinsents Kūkojs, “Dabasu durovys”, jaunīšu kors “Balsis” i cytus. Dzejis performaņcis snēgs Guntars Račs, Anna Rancāne, Annele Slišane i cyti. Itūs ailinīku vydā byušu ari es. Muzykalajuos pauzēs nūteikti varēs labi izadoncuot, cikom dzejis lasejumu laikā atviļkt elpu.