Rokstu sagataveja: portals lakuga.lv

Radeita jauna kruosojamuo gruomota, kurā apkūpuoti 20 zynomuokī kulturviesturis i Latgolys turysma apsavieršonys objekti, informej Daugovpiļs Turysma nūdalis vadeituoja Līga Rudzīte-Besakirska. Gruomotys prezentacejis pasuokums byus 24. septembrī 16.00 stuņdēs Latgolys Centraluos bibliotekys Saimis digitalūs aktivitašu centrā (Reigys īla 22a, Daugovpiļs).

Gruomotā “Kruosojūt Latgolu: kulturys montuojuma īdzeivynuošuona” ir atrūnams Daugovpiļs cītūksnis, Latgolys viestnīceiba “Gors”, Preiļu muižys komplekss i cyti zynomi Latgolys objekti. Dorbi zeimāti ar rūku, datorā veicūt tik tūs piecapstruodi. Dūmojūt par latgalīšu volūdys saglobuošonu, objektu aproksti ir kai latvīšu literarajā, tai latgalīšu rokstu volūdā, kvadratkods vad iz objektu plotuoku aprokstu škārsteikla turysma vītnēs.

Gruomotys ilustraceju autore ir muokslineica Jelena Ondzule, kas dzymuse Leivuonā. Pabeiguse Reigys Dizaina i muokslys vydsškolu, uodys dizaina nūdaļu, tok piec tuo – datordizaina nūdaļu Daugovpiļs Universitatē. Muokslineica puorsvorā struodoj ellis i jauktajuos tehnikuos, voda meistarklasis, taisa personalizstuodis i pīsadola grupu izstuodēs.

Gruomotys “Kruosojūt Latgolu: kulturys montuojuma īdzeivynuošona” prezentacejis laikā gostim byus vareiba apsavērt kruosojamū gruomotu, pasarunuot ar tuos autori, kai ari pīsadaleit nalelā viktorinā par Latgolu ar vareibu sajimt tematiskys bolvys.

Piec gruomotys prezentacejis tei tiks izplateita vysūs Latgolys turysma informacejis centrūs, kai ari byus daīmama digitalā formātā vītnē visitdaugavpils.lv. Projekts realizāts ar Vaļsts kulturkapitala fonda mierkprogramys “Latvīšu viesturyskūs zemu atteisteibys programa” finansialu paleigu.