Rokstu sagataveja: portals lakuga.lv

Sastdiņ, 28. septembrī, Latvejis Jaunuotnis padūmis Latgolys viestnīceiba, kurū niu koordinej bīdreiba “LOBS”, organizej Latgolys organizaceju teikluošonuos nūtikšonu “Latgales organizācijas IR”. Kai informej nūtikšonys reikuotuoji, juos mierkis ir veiduot i styprynuot Latgolys organizaceju sadarbeibu dorbim iz prīšku, projektūs i sadarbeibys nūtikšonuos.

Nūtikšonys “Latgolys organizacejis IR” programā paradzātys darbneicys ar improvizacejis elementim vysaidūs projektu pūsmūs kūpā ar sertificātu treneri Elīnu Andersoni (īpīšk Bisenieci), ar pīredzi, eistynojūt ASV viestnīceibys i Britu Padūmis Latvejā (British Council Latvia) projektus, pasadaleis Līga Springa (“Giut Breidi” i bīdreiba “Esi vasals”), Ingūna Semule (bīdreiba “LOBS” – Latvejis Jaunuotnis padūmis (LJP) daleiborganizaceja) stuosteis par LJP mierkim, aizdavumim i īspiejom palikt par juos daleiborganizaceju, bet Jānis Jurčenko (bīdreiba “LOBS”, Erasmus+ īsakļaušonys projektu mentors) pasadaleis ar vareibom i praktiskū informaceju ap Erasmus+ Discover EU Inclusion projektim, taipat “Zero Waste Latvia” puorstuove Evija Uozuola-Uozuoliņa (Ozola-Ozoliņa) stuosteis par vareibom i padūmim, kai organizacejis var dareit projektus videi draudzeiguokus kai teoretiski, tai i praktiski.

Latgolys organizaceju sasatikšona paradzāta 28. septembrī nu 11.00 da 16.00 Rēzeknē, Breiveibys īlā 40. Pīsadaleit var sevkura organizaceja, kurei grib izzynuot vaira, sasatikt, sasadorbuot i styprynuot kapacitati, pīsadaleišona ir bez moksys.

Kai stuosta nūtikšonys reikuotuoja, bīdreibys “LOBS”, kas dorbojās Rēzeknis nūvodā, puorstuove Ingūna Semule, palīkūt par Latvejis Jaunuotnis padūmis Latgolys viestnīceibu, vīns nu bīdreibys aizdavumu ir veicynuot, lai Latgolys organizacejis vaira sasadorbuotu sovā vydā i byutu stypruokys, raksteitu kūpeigus projektus. “Eipaši sasadorbuot aicynuotys organizacejis, kas struodoj ar jaunīšim, bet na tik taidys deļ tuo, ka dorbi, kū varātu dareit kūpā, ir paradzāti vysaidom dzeivuotuoju grupom. Organizacejis sovā vydā var apsamaineit pīredzē, eistynuot kūpā projektus, jaunīši var braukt pi senioru i ūtraiži. Es iz tū vaira verūs kai bīdreibu, organizaceju sadarbeibu kai taidu – kontaktu veiduošonu, teikluošonūs, lai Latgolā byutu stypruokys organizacejis kai taidys,” soka I. Semule.

Nūtikšona teik eistynuota projektā “Regionalūs jaunuotnis organizaceju kapacitatis styprynuošona interešu aizstuoveibys sferā (LJP 9.0)”. Projektu finaņsej Eiropys Savīneiba #NextGenerationEU i #SIF_sociālādrošība.

Publikaceju apmoksoj bīdreiba “LOBS” projektā “Regionalūs jaunuotnis organizaceju kapacitatis styprynuošona interešu aizstuoveibys sferā (LJP 9.0)”.