Kulturys īsacejumi nedeļai: tautystārpu izstuode, nakonference jaunīšim i nedeļgols Rēzeknē

Kulturys īsacejumi nedeļai: tautystārpu izstuode, nakonference jaunīšim i nedeļgols Rēzeknē

Rokstu sagataveja: portals lakuga.lv

Kulturys īsacejumus itai nedeļai sagatavejuse literate, bibliotekare i gruomotu blogere Meldra Gailāne. Jei īsoka vēļ īspēt apsavērt tautystārpim veļteitū fotoizstuodi “Piecgarša” Lūznovys muižā, napalaist garum nakonferenci jaunīšim “Grāmata un telefons. Atklātais rings”, kai ari nedeļgolu pavadeit Rēzeknē.

“Piecgarša” Lūznovā

Tai pavysam dreiži i septembris dūdās paceli. Vosorys izskaņā, nui, nui, itymā godā septembris vēļ ir vosorys mieness, var dūtīs iz Lūznovys muižu, kab apsavārtu izstuodi “Piecgarša” i, kas zyna, varbyut atrostu kaidu pazeistamu seju biļdēs. Jau piec 28. septembra izstuode brauks tuoļuok iz Varakļuonim.

Izstuodē fotografejuos radzamys leleitis-tautumeitys nu izstuodis “Lobs ar lobu sasatyka” kūpā ar Latvejis cylvākim – tautystārpu nosuotuojim. Tei ir kai loba piecgarša paguojušuo goda dzīšmu i deju svātkim. Projektā sasadorbuojuse tautystārpu nosuošonys entuziaste Iveta Seimanova, fotografe Sintija Cērpiņa, multimuokslineica i projekta logo autore Evika Muizniece, kai ari Zvīdrejā dzeivojūša latvīšu izaceļšonys muokslineica Kristīne Lagzda Haapanen, veļtejūt kotrai fotografejai zeimiejumu – dūmu lineju.

Izstuodis afiša

Gruomota voi telepons?

Školuotuoji, bibliotekari i cyti pīaugušī syt trauksmi, ka bārni vaira naskaita gruomotys, a vysu sovu laiku pavoda teleponūs. 26. septembrī Preiļūs Golvonajā bibliotekā nūtiks nakonference jaunīšim “Grāmata un telefons. Atklātais rings”, kurymā raudzeis nūskaidrot, kai tod ir ar tū gruomotu skaiteišonu jaunīšu vydā, kai ari varēs paraudzeit saraksteit kaidu sovu aili i īsavuiceit tū nūrepuot.

Pasuokuma afiša

Nedeļgols Rēzeknē

Nedeļgolā juobrauc iz Rēzekni! 28. septembrī “Gorā” juoaizīt iz Aijai Rimšai, Latgolys laksteigolai, veļteitū koncertu “Kā tauriņi gaismā”, bet 29. septembrī – iz Mikeļa dīnys godatiergu “Buļbu tolka ar dzīduošonu i doncuošonu”. Nu reita 10 stuņžu da piecpušdīnis 15.00 vysā Latgolys īlys garumā byus tierguošonuos, koncerti, retro auto, meistarklasis i rodūšuos darbneicys. Dareit kū byus i lelam, i mozam!

Pasuokuma afiša

A svareiguokais īsacejums byus – atrūnit laiku poši sev! Rudiņam pīstuov sasarytynuot dečī, pajimt sylta čaja krušku i mīreigi pasavērt pa lūgu, aiz kura skrīn dzeive ci aust jauna dīna.


Kalenders

Feb
15
Sai
all-day Izstuode “Divi fotogrāfi – dažād... @ Latgolys Kulturviesturis muzejs
Izstuode “Divi fotogrāfi – dažād... @ Latgolys Kulturviesturis muzejs
Feb 15 all-day
Rēzeknis fotografi Ivars Daugulis i Eduards Utāns apvīnuojuši vīnā izstuodē diveju žanru fotografejis. Ivars Daugulis bīžuok sova fotoaparata objektivu pavierš ainovys vierzīnī, giunūt šaļts i dobā, i piļsātys vidē. Sovpus Eduarda Utāna fokusā itūreiz sīvīšu[...]
all-day Latgolys Etnografiskuos viestnīc... @ Varakļuonu nūvoda muzejs
Latgolys Etnografiskuos viestnīc... @ Varakļuonu nūvoda muzejs
Feb 15 all-day
Kai stuosta “Latgolys etnografiskuos bīdreibys” vadeituoja Iveta Seimanova, tod bīdreibys jaunais projekts – vysaidu Latvejis vītu tautystārpūs apvylkti ļauds, kuri īmyužynuoti kūpā ar jau zynomajom projekta “Lobs ar lobu sasatyka” lelem Latgolys tautystārpūs – ir[...]