Rokstu sagataveja: portals lakuga.lv

9. oktobrī 18.00 stuņdēs Rēzeknis nūvoda Lūznovys muižā tiks atkluota izstuode “Baba, kurū škārsteikla bārni vaira napīdzeivuos”, kas liks aizadūmuot par tū, kai puorsamejūt paaudzem, mainuos myusu dīnu babeņu lūma saimēs i sabīdreibā, informej izstuodis reikuotuoji.

Baba ir kai Latgolys fenomens, arhetipisks tāls, kura oda zečis, losa gazetys, marinej konservus, slauc gūtenis i iz pīna golda nūdūd pīnu, revej duorzu, cap špeka peirāgus i dora cytys babom pīdareigys lītys. Tok taidys babys myusu laikūs pīdzeivoj reši kurs. Atsateistūt tehnologejom i dzeivis leimiņam, jaunuo alfa paaudze aba škārsteikla bārni taidys babys vaira napīminēs.

Vystik myusu dīnuos daudzi vys vēļ pīmiņ vosorys dzeraunē pi babys, kod piec sīna tolkys beja vareiba nakšņuot pyunē. Nu rudzu stībra dzert syltu gūvs pīnu voi, cikom baba slauce gūvi, tuos graulis dekorēt kai tortus. Dīvamžāļ lauki pamozam izmierst i leidz ar pādejū gūvi izmiers ari ituos atminis.

Apvīnojūt klasiskū i laikmeteigū, izstuodē “Baba, kurū škārsteikla bārni vaira napīdzeivuos”, tiks attāluota 75 godus vacuos Valentinys Priževoitis dzeive Latgolys laukūs. Izstuodē byus radzamys fotografis Amandys Anusānis īprīšk biļdātuos i eipaši izstuodei sagataveituos fotografejis. Tūs apstruodei tiks izmontuoti muoksleiguo intelekta reiki, kab attāluotu nuokūtnis babu paaudzi. Izstuodis ekspozicejis autore ir Liāna Merņaka, fotografejuos byus attāluoti vysaidi sadzeivis prīškmati i teksti latgaliski. Izstuodis mierkis nav romantizēt itūs laikus voi dzeivisveidu, tok dabuot, kab apmaklātuojs piec vareibys izteiktuok izjustu itūs babu kasdīnu i apsazynuotu, ka itei babu paaudze mozbānim dreiži viņ byus nazynoma.

Izstuodis eistynuošonu atbolsta Lūznovys muiža i Rēzeknis nūvoda pošvaļdeiba ar leidzfinansejumu nu rodūšūs dorbu konkursa.